Nimin Dt 22.9.15 khan Lawngtlai West bialtu leh Minister of State for AH & Vety, etc., Pu C. Ngunlianchunga chuan a bial chhung khua, Mampui, Ngengpuikai, Diltlang, Hmunnuam, Chawngtekai leh Mualbu te a tlawh a, AH & Vety hnuaia NLUP 2nd Phase Vawkvulh tanpuina dawngtute hnenah Final Instalment a hlan nghal bawk.

Pu C. Ngunlianchunga chuan, Mizoram sawrkar in mipuite a ngaihtuah em em a, an duhthlan ngei eizawnna an neih theih nan NLUP hmangin a tanpui a ni. Vawkvulh thlangtute chu sawrkarin, Vawk note a pe a, a in sakna a pe a, a chaw leina a pe a, damdawi a pe a, mamawh an neih apiangah a pui zel bawk. Chutiang bawkin trade dang thlangtute pawh a tanpui vek ani. Heti ang khawpa sawrkarin min ngaihsak chung pawha kan lo thawk chhunzawm ve peih lova kan la hlawhchham pui fo a nih chuan beisei tur dang a awm tawh lovang, a ti.

Minister chuan, sawrkar atanga tanpuina leh therhlo um reng mai leh thawkchhuaktu nih tum ve hauh lo, kutdawh rilru pu chunga sawrkar dawr thinte tan hmun a chep tial tiala, an kawng a la ping dawn a ni. Thawkchhuaktu ni turin inbuatsaih ang u, intipaukhauh ila i bei sauh sauh ang u, hloh ringawtin sawrkar a kal reng thei tawh lova thawhchhuah a ngai a ni, tiin khaw hrang hranga mipuite chu a fuih a ni.

Minister chuan Mampui a Vety Farm pawh nasa taka tihchangtlun a nih tur thu sawiin Ar awpkeuna (Hatchery) Tribal Affairs Ministry tanpuina Rs. 125 lakh hmanga siam a nih tur thu te, National Life Missions hnuai atanga Farm tih changtlunna tur Rs 34 lakh hmuh a nih thute, Social Welfare atangin Bawng vulhna tur thar Rs. 24 lakh senga buatsaih a nih tur thute a tarlang bawk.

Minister hian NLUP Vety Department hnuaia Vawk vulh thlangtu 2nd Phase a mite hnenah Final Instalment tanpuina Rs. 10,050 leh Rs 10,550 (an lo dawn tawh dan atanga an dawn hmabak la awm) chu heng khaw 6 a chhungkaw 37 te hnenah a hlan nghal bawk.

Minister hian vawiinah Chawngte Group YLA Conference a hmanpui anga, chumi hnuah Tuichawng luidunga a bial chhung khuate a la fang chhunzawm leh dawn a ni.