2439/2026-2027

Aizawl, the 30th of September, 2026: Vawiin chawhma khan Pu Lalnghinglova Hmar, Minister of State (i/c), Sports & Youth Services, Tourism, LESDE leh Excise & Narcotics leh Aizawl West II Assembly Constituency bialtu MLA chuan Govt. Aizawl West College ‘34th Annual College Week’ Closing Function chu Vanapa Hall-ah a hmanpui.

Khuallian Pu Lalnghinglova Hmar chuan eizawnna leh hmasawnna kawng zawh turin ṭawng dang thiam a pawimawh thu sawiin "Vawiinah College Week Closing Function-a ka rawn tel thei hi a lawmawm ka ti a, ṭawng chihnih a programme kan hmang hian min tilawm hle. Mizote hian communication skills-ah hnamdang kan pha lo fova, college kan chhuahsan hnua thil kan tih tak tak dawnah hei hi thil pawimawh tak a nih avangin hma kan sawn a ngai a ni. Kan pianpui ṭawng kan thiam tur a ni a, pianpui ṭawng ni lo ṭawng chi khat tal kan thiam ngei a pawimawh bawk." tiin zirlaite a fuih a. 

Minister Pu Lalnghinglova Hmar chuan zirlai inhlawh ṭhinte tan hamṭhatna hrang hrang awm theihna Mizoram Building & Other Construction Workers Welfare Board (MBOCWWB) hnuaia member a inziahluh ṭhatna a sawi a. Welfare Board member nih chuan kawng hrang hranga hamṭhatna leh puihna dawn theih a awm bakah, skill development training kalpui dan tur thlengin ruahmanna a awm tih a sawi. 

Tourism Minister chuan tourism chu ram economy tih hmasawnna pawimawh tak a ni thu sawiin, "Mizoramah khualzin an pung a, tourism sector-ah kan ṭhang nasa hle. Communication skill-ah zirlaite hian hma kan sawn chuan tourism sector-ah hian eizawnna ṭha tak keimahni tan ngei hian a awm thei reng a ni." a ti a. "Khualzin an pun nasat avangin keimahni lam inbuatsaihna neih a pawimawh a, kan nunphung leh sakhuanate her danglam chiam si lovin kan inhawn thiam a ngai a, sensitisation mumal tak neih a pawimawh a, kan kalpui dawn" a ti bawk.

Sports Minister ni bawk Pu Lalnghinglova Hmar chuan, "Sports & Youth Services in 2036 Olympics thlir chungin Bana Kaih hnuaiah Empowering Mizoram Sports (EMS) chu a kalpui a, Zoram dung leh vangah sports discipline thlan bik pariat hmangin kum 8 aṭanga 15 inkar talent haichhuak turin hma a la mek. Mizoram hmung hrang hrangah kalpui a nih bakah Aizawl veng ṭhenkhatah pawh kalpui niin kan veng leh khua a khawtlang hruaituten neih ve an duh thu thlen se, kalpui turin a ngaihven theih reng a ni." tiin a sawi a. Mizoram in infiamna lamah ram leh ram inelna kan thlir thlen hmain state leh state inelna leh National Games-ah te medal la tura ṭan kan lak a ngai a ti.

Excise Minister hian zirlaite chu ruihhlo a fihlim tura chahin, "Hun engemaw chen aṭang khan kan khawtlanga ruihhlo a hluar avangin theihtawpin hma kan la a, tunhnaiah ruihhlo ṭhenkhatte chu a rêm deuh tawh. Chutihrualin ruihhlo ṭhenkhat, ṭhalai leh tleirawl naupang zawkte zinga hluar a awm a, hengte hi a lo luh dan kawng hrang hrang chhui zel niin tirêm hma lak zel a ni." a ti a. "Kan ram ṭhalai zingah ruihhlo avanga buai kan tam a, chuvangin zirlaite hi chu ruihhlo lakah kan fihlim tur a ni" tiin ruihhlo laka fihlim a pawimawhzia a sawi bawk.

Bialtu MLA hian a bial chhung college zirlaite chu hun remchang a awm hunah zawhna leh chhanna hun hmanga interactive session neih ṭha a tih thu a sawi tel.

Govt. Aizawl West College Annual College Week Closing Function hi hun hniha hman a ni a. Session hmasa zawkah hian Dr. PL. Ramliana, Principal chuan kalkhawmte lawmna thu a sawi a.  H. Lalbiakzauva, General Secretary, Students’ Union in Week report pe-in, week chhunga tiṭhate hnenah medal leh certificate semna hun hman a ni bawk.