472/2025-2026

Aizawl, the 6th of May, 2025: Vawiin atang khan Pu Lalnghinglova Hmar, Minister of State, Sports & Youth Services etc., Aizawl West-II bialtu MLA ni bawk chuan a bial chhunga sawrkar school te a tlawh tan a. A ni khatnaah hian Kanan, Vaivakawn leh Dawrpui Vengthar-a school pasarih tlawhin, ruahman lawk ang chuan tunkar chhunga school te hi tlawh zawh hman a tum a ni. 

Bialtu MLA Pu Lalnghinglova Hmar chuan sawrkar school te chu mipui nawlpui ban phak leh mi harsa zawkte chhawk zawngkhaitu a ni tih a sawi a. “Zirtirtute pawh training palchhuak leh thiam zawk an nih avangin sawrkar school hi mipui nawlpui luh duhna tura kan siam a ngai. Mipui rilruah sawrkar school rinna tuh turin kan zavaia kan tanrual a ngai a ni” a ti. 

LESDE Minister ni bawk Pu Lalnghinglova Hmar chuan sawrkar school a lutte chu a tlangpuiin an nu leh pa te kut hnathawk an ni thin tih a sawi a. Zirlai nu leh pa Mizoram Building & Other Construction Workers’ Welfare Board (MBOCWWB) hnuaia inziak lut thei te chu in register tura finchhuah zel turin zirtirtute a chah. MBOCWWB member leh an fate tan hamthatna hrang hrang a awm tih sawiin, “MBOCWWB kaltlangin zirna chawisan kan tum mek a. Welfare Board member fa tamna school tan Welfare Board fund atanga inpuih theih dan a awm em tih kan ngaihtuah dawn a ni” a ti. Zirlaite chuan lehkha zir pangngai piahlamah kut themthiamna (skill development) engemaw tal an puakchhuah theihna turin ruahmanna siam an tum tih a sawi a ni. 

Aizawl West-II bialtu MLA chuan zirtirtu pakhat tlâiin school naupang engemawzat a nghawng avangin zirtirtute tân tlai a thiang lo tih a sawi a. Aizawl West-II a zirtirtute chu an tlai ngai lo tih theih tura tang turin a chah bawk. 

Minister in a bial chhunga school a tlawhnaah hian zirna hmasawnna atana rawtna awmte sawiho a ni a. Tui in tur thianghlim, inthiarna fai leh him, computer leh a kaihhnawih, hmeichhiate tana sanitary pad leh school mamawh hrang hrangte sawihoin, a theih chen chenah tihlawhtling tura hma lak a ni bawk a ni. Sawihona atanga rawtna hrang hrang awmte pawh tun academic session chhunga bawhzui tura ruahmanna siam a ni bawk. 

Vawiina MLA in school a tlawhnaah hian hian School Education Department hotute ten an tawiawm a. Local Council leh khawtlang hruaitute’n anmahni veng huamchhung theuhah an lo tawiawm bawk a ni.