514/2025-2026

Aizawl, the 8th of May, 2025: Vawiin khan Pu Lalnghinglova Hmar, Minister of State, Sports & Youth Services, etc., Aizawl West-II bialtu MLA ni bawk chuan a bial chhunga sawrkar school te a tlawh chhunzawm. Dinthar, Dawrpui Vengthar leh Tuikual North a school pariat a tlawh a, May ni 6, 2025 Thawhlehni khan Kanan, Vaivakawn leh Dawrpui Vengthar-a school pasarihte tlawh tawhin ruahman dan angin Zirtawpni, May ni 9, 2025 hian school te hi a tlawh zo ang.

Bialtu MLA Pu Lalnghinglova Hmar chuan, "Mipui rilruah sawrkar school rinna tuh turin kan zavaia kan tanrual a tul. Zirtirtute pawh training nei leh thiam zawk an ni a, sawrkar school hi nu leh pa nawlpui in an fate luhtir an duhna tura siam turin thahnem kan ngaih lehzual a ngai a ni." tiin sawrkar school te chu mipui nawlpui ban phak leh mi harsa zawkte chhawk zawngkhaitu a ni tih a sawi.

Zirtirtute chu an zinga pakhat lek kal tlai pawhin school naupangte a nghawng thin tiin zirtirtute tan kal tlai a thiang lo tih a sawi bawk a. Aizawl West-II a zirtirtute chu an tlai ngai lo tih theih tura tang turin a chah a. An zirlaite chu result ringawt piah lama hmasawnna leh thiamna tlo an neih theihna tura theihtawp chhuah turin a ti bawk.

LESDE Minister ni bawk Pu Lalnghinglova Hmar chuan sawrkar school a lutte chu a tlangpuiin kut hnathawk chhungkua atanga lo chhuak an ni thin tih a sawi a. "MBOCWWB member fa tamna school tan Welfare Board fund atanga inpuih theih dan a awm em tih kan ngaihtuah dawn a. Welfare Board kaltlangin zirna chawisan kan tum mek" a ti a. Zirlai nu leh pa Mizoram Building & Other Construction Workers’ Welfare Board (MBOCWWB) hnuaia inziak lut theite chu in register tura finchhuah zel turin zirtirtute a chah.

School hrang hrang tlawhnaah hian Pu C.Lalthanzira, State Project Director, Samagra Shiksha, Mizoram pawhin thu sawiin school ten zirlai tam zawk an neih theihna tura tan lak a tul thu a sawi a. "Kan tihdan ngai renga kan kal chuan tun dinhmun atang hmasawnna a awm dawn lova, kan enrollment-ah hmasawnna hmuh tur a awm loh chuan nakin zelah nghawng a nei thui thei dawn. Hemi tur hian zirtirtute kan pawimawh ber a, kan la tih ngai loh tha te ti a tan kan lak hi a pawimawh hmasa ber chu a ni." tiin a sawi a, enrollment-ah hmasawnna a awm loh chuan intihchangtlun a harsat thu a sawi bawk.

Minister ho hian a bial chhunga school-te hmasawnna atana rawtna awmte sawiho a ni a. School mamawh hrang hrangte sawiho niin rawtna hrang hrangte chu tun academic session chhungin a theih anga bawhzui tura ruahmanna siam a ni a, academic session lo awm leh turah danhlamna thlen thei turin tub session hman mek chu inbuatsaihna huna hmang turin Minister-in a chah. 

Sawiho zingah hian zirna hmasawnna tur bakah naupang tana tui in tur thianghlim, inthiarna fai leh him, infiamna hmanrua, hmeichhiate tana sanitary pad-te leh thildangte a tel. 

Vawiin MLA in school a tlawhnaah hian State Project Director, Samagra Shiksha, Mizoram bakah School Education Department lamin an tawiawm a. Local Council leh khawtlang hruaituten anmahni veng huamchhungah an tawiawm bawk.