2725/2026-2027

Aizawl, 2026 Khuangchawi Thla ni 18: Nizan khan Kanan Branch YMA, Aizawl chuan an din champha vawi 53-na lawmna hun chu Kanan Middle School tual zawlah an hmang a, Aizawl West-II bialtu MLA leh Minister ni bawk Pu Lalnghinglova Hmar chuan khuallian niin a hmanpui.

Excise & Narcotics Minister MLA Pu Lalnghinglova Hmar chuan naupang leh thalaite chu ruihhlo laka inthiarfilhlim turin a chah a. “Sawrkar leh Central YMA tangkawp hmalakna vangin tunlaiah a hma ai chuan heroin no. 4 a vâng tawh a, chutihrualin ganja leh khuh damdawi lamah thalai, a bikin tleirawl leh naupang zawkte an kal nasa.” tiin, hemi kawnga inthiarfihlim turin tleirawl leh naupang kalkhawmte a chah a. Nu leh pate chu hemi kawnga an fate fimkhurpui tur leh, Kanan YMA te pawh theihtawp lo chhuah zel turin a chah a ni.

Pu Pu Lalnghinglova Hmar  chuan naupang leh thalaite tán Mizoramah thil ṭha tam tak a awm a, chung zingah chuan lehkha thiam a la ṭha ber tih a sawi a. “Zaninah lehkha thiam chawimawina hun in siam hi ka lawm a, naupangte pawh zirna ngaipawimawh ula, in zirna in neih ang angte pawh theih angin kan chei zel ang.” a ti a.

Bialtu MLA chuan Rising Day lawmna hun hmanna Middle School tual chu basketball leh volleyball khelhna hmunpui ber a ni a, thengthaw nuam taka puipunna tur leh infiamna turin a chung khuhna tur pawisa dah fel a nih tawh thu leh, kuminah hna thawh tan tum a nih thu a sawi bawk a ni.

Kanan Branch YMA hian an dincham vawi 53-na hi thla khat chhung vel an lawm a, infiamna hrang hrang hmanga inelna neih a ni. Nizana lawmna pui ber hi session hnihah then niin, session khatnaah vengchhunga zirlai tithate chawimawina hun hman a ni a, Labour, Employment, Skill Development & Entrepreneurship (LESDE) Department hnuaia insak leh a kaihhnawiha thawkte tan hamthatna hrang hrang awm theihna, Mizoram Building & Other Construction Workers Welfare Board (MBOCWWB) chungchang inzirtirna hun hman a ni bawk. 

Session hnihnaah tunlai zaithiam lar tak takte nen concert hun nuam tak hmangin Rising Day lawmna hun khar a ni.