2724/2026-2027

New Delhi, October 17: Mizoram Sawrkar Disaster Management and Rehabilitation Minister Prof. Lalnilawma chuan October 16 (Zirtawpni) khan New Delhi-a Mizoram House-ah NBCC (India) Limited Chairman leh Managing Director Dr. K. P. Mahadevaswamy nen inkawmna pawimawh tak an nei a; leimin laka invenna leh chhiatrupna dawl zo ruhrel din leh siamthat dan kawnga thawhho dan tur an sawiho.

Prof. Lalnilawma chuan Mizoramah, a bikin furpui laia lei a min fo thin thu sawiin, hei hian mihring nunna, kawngpui, hmunhma leh building pawimawh te, chenna hmun leh khawtlang inkalpawhnate a tichhe nasa thin hle tih a sawi a. Minister chuan lei min hlauhawm laka invenna atan science thiamna hmanga zirchianna kalpui tul a tih thu te, hun lo la kal zel tur atan lirnghing leh chhiatna lo thleng thei thlir lawka hmalak a tul thu te,  chhiatna thlen hnu-a siam thar tum ai chuan inven lawk dan tur ngaihtuah a, inbuatsaihna tha tak kalpui a tul thu a sawi a. Mihring nunna leh infrastructure pawimawh te humhim chu State-in a ngai pawimawh tih Minister chuan a sawi a ni.

Minister chuan NBCC technical leh engineering lama thiamna hmangin lei min theihna hmun hriat chian (landslide hazard mapping), geology leh geotechnical survey, leilung dinhmun leh lei ngheh zawng zirchian, lei min hlawuhawmna hmun thlan chhuah leh a hmachhawn dan tur ruahmanna siam chungchang te a sawipui a ni.

Mizoram tlang ram dinhmun mil tura engineering leh technology thar hman theih dan tur pawh an sawi ho a. Chutah chuan retaining wall siam, gabion wall siam, soil nailing, rock bolting, slope stabilisation leh tuihawk luanna tha zawk siam te pawh tel a ni.

National Landslide Risk Mitigation Programme (NLRMP) chu he meeting-a ngai pawimawh ber zingah a tel a. He Programme hnuaiah hian hmalakna hmasa atan heng dinhmun derthawnga ding, leimin hlauhawmna hmun nia lang te hi ngaih pawimawh hmasak ni se, an ti a ni.

Disaster Management and Rehabilitation Department Secretary Pu Sushil Singh, IAS, pawh he meeting-ah hian a tel a. Pu Sushil Singh chuan Mizoram dinhmun tlangpui sawiin, an hmalak mekna te, harsatna an tawh te leh chhiatna lo thleng thei laka inbuatsaihna kawnga Mizoram Sawrkar hmalakna te a sawi a ni.

NBCC lam atangin Dr. Suman Kumar, Director (Commercial), Pu Sanjay Kumar leh officer senior, technical lama thiamna nei dangte pawh an tel a. Anni chuan technical leh engineering lama thawhho dan tur tha ber nia an hriat te an sawi a ni.

He meeting hi hlawhtling taka neih niin Mizoram Sawrkar leh NBCC inkara technical lama inpawhna leh thawhhona kawng zau zawk a hawn theih beisei a ni.