2722/2026-2027 

Dated Champhai, the 16th October, 2026 : Zanin khan Pu Lalnghinglova Hmar, Minister, Tourism Department chuan Hnahsin Kut 2026 kharna hun Mualnuam, Champhai-ah a hmanpui a, Aizawl West-I bialtu MLA Pu TBC Lalvenchhunga, Adviser to CM (Finance) pawh a tel a ni.

Minister Pu Lalnghinglova Hmar chuan kalkhawmte chu Hnahsin Kut pualin chibai a buk a. Hnahsin Kut hian Champhai leh a chhehvel tan sum leh pai vir vel (economy) leh kawng hrang hrangah hlawkna a thlen thu sawiin, he festival ngaihtuah chhuaktu leh bul ṭantu, Champhai Nature Conservancy (CNC) te thawhrimna leh remhriatna avangin lawmthu a sawi a. 

Mizoram chhunga chengte hian kan ram chhunga hmun mawi leh pawimawh kan neihte leh kan Mizo artist-te kan ngaihlu telh telh tih sawiin, Mizo-te kan intlawhpawh tam hian, sum vir vel a ti pungin local economy a ti tha a, kan zinna thlalakte kan thehdarh avangin ram pawna miten kan ram chhung hmun mawi leh nuamte an hriat phahin, tourism a than nasat phah tih a sawi a. Kum 2026 chung hian Mizorama mihring chhunga cheng zat (population) dawn khualzin kan hipluh hmel a, Hnahsin Kut leh Champhai hian hemi kawngah an thawhhlawk hle tih a sawi.

Minister chuan Hnahsin Kut hian social media-ah 22.5 million zet en a hlawh thu sawiin, hei hian a lar zia leh hlut a nih zia a lantir a ti a. Mizoram aia mawi ram dang a awm bik lo tiin, Champhai leh Mizoram hi India ram chhung mipuite mai bakah ram pawn mipuite punkhawm nan kan siam thei a ti a. State pawn aṭanga lo kal khualzinte pawh an ṭhian leh chhungte nen Mizorama lo zin leh ngei tura sawmin, Mizoram mawina te, ram ralmuang a nihna leh mipuiten khualzin an lawmthiamna (hospitality) chungchang te midangte hnena hrilh darh zel turin a chah tel bawk.

Hnahsin Kut tawp zanah hian Mizo zaithiam lar tak takte hovin concert neih a ni a. Mipui kalkhawm an thahnem hle a ni.