Vawiin hian Serchhip DC Conference Hall ah Education Campaign neih a ni a, Education Minister Pu H. Rohluna chu khuallian niin Education Parliamentary Secretary Pu Joseph Lalhimpuia chu khualzahawm a ni.

Khuallian Pu H. Rohluna chuan, kan ramah zirna tha zawk a awm theih nan sawrkarin theihtawp a chhuah a, chutihlaiin ruahmanna te a taka kalpui tute chu zirtirtute an ni, zirtirtuten an theihna leh inpekna an lan chhuah tir loh chuan a tak ram kan thleng thei lo a ni, a ti. Zirtirtu tha, mahni hnaa in pe hmuh tur tam tak kan ramah an awm a, an ni ho hi ka ngaisangin ka zah hle a ni, a ti bawk.  Minister hian, zirtirtu thenkhat Social Media leh kawng danga sawrkar mawng hlim ching te, Code of Ethic kal pela mahni duh dana then mai mai ching an awm thin hi a pawi hle a, sawrkarin heng ho hi a en liam mai mai dawn lo a ni a ti. Hmun hrang hranga school leh a thawktuten hasatna an neih te chu a hriatpui thu sawiin vawi lehkhatah an mamawh phuhruk vek thei lo mah ila, a chak thei ang bera an mamawh tih sak zel kan tum dawn a ni, a ti. In- Service training tih tawp a nih thu leh Pre-Service Training chauh zirtirtute tan kalpui a nih tawh thu sawiin Minister chuan, hei hian inzirna nei miah lova naupangte tawngpawng zirtir ve ringawt te, zirtirtu thenkhat Training chhuanlama aikal lak tumte a ti tawp vek dawn a, aikal lakna chhan tur chhuanlam zirtirtuten an nei tawh lova ni a ti bawk. Zirtirtu chu khawtlang zirtirtu, naupangte  entawn ber an nih hre reng tur leh, zirlai nu leh pate nena inpawhna tha nei turte, naupangte kal zelna tur kawng hriatpui theih thin tum turte a chahin vawiina an thawhrah hi nakin lawkah kan ramin a seng dawn tih a hrilh a ni.

Khualzahawm Pu Joseph Lalhimpuia pawhin thusawiin, Pathianin zirna chu hmanruaa hmangin kan ram min zawng chhuak a, vawiin thlengin kan ram chawikan nan zirna bawk min la hman sak zel a ni, a ti a. Chu hmanrawn ropui tak hmangtute chu kan zirtirtute hi an nih avangin an inpekna hian ram a chawikang theia, an inthlahdahna avangin ram a hnufual tlat thei ani, a ti. Sawrkar in theihtawpin zirna lamah a chakna a seng tih sawiin SDEO Office te pawh tih changtlun zel an ni a, staff te pawh a theih ang anga ngaihtuah niin Thingtlanga zirtirtute quarters turte pawh nakin lawkah hian a sak hna kan tan dawn a, tin mi thenkhatten sumdawnna ang chauhva ngaia zirlaite tana hostel mumal lo taka an siam thin pawh sawrkar in dan thar siamin a umzui tawh dawn ani, a ti.

Education Campaign inkhawm kaihruaitu Education Director Pu K. Lalthawmmawia, IAS chuan tun tum hi Education Campaign an neih tum thumna a nih thu sawiin, zirtirtute chu inpekna thar neia an hnathawhna lam pan tura ngenin sawrkar ruahmanna te a taka kal puitu an nih thu hre reng turin a chah a, an mamawh leh an harsatna te chu engtiklai pawha a ngaihthlak thin tur thu a hrilh bawk.

He inkhawmah hian Pu R. Vanrengpuia, SDO Sadaar, Serchhip chuan Bawrhsap aiawhin inlawmna thu a sawi a, zirlai naupang zaithiam te hnen atangin zai mawi tak tak ngaihthlak a ni bawk. He hun hmang tur hian District chhung atangin zirtirtu thahnem tak an kalkhawm a ni.

Minister leh Parliamentary Secretary te hian chawhnu lamah Serchhip Chanmari venga DIET Building sak mek leh Serchhip AOC Venga Education Department Complex sak mek chu an tlawh nghal bawk. Minister hi Aizawl atangin SSA State Project Director Pu Lalhmachhuana, SSA Deputy State Project Director Pu Lalnunsiama leh Office dangten an  tawiawm a ni.