No.3092/2021-2022
Aizawl, the 22nd November, 2021: Social Welfare Minister Dr. K. Beichhua chuan vawiin khan Siaha District chhunga sorkar hmalakna hnathawh mek enfiah chhunzawm zelin Tipa 'V' leh Saikao khua a tlawh.
Tipa "V" Circuit House a hmuahna programme neihah Social Welfare Minister Dr. Beichhua chuan thuchah sawiin, Covid hrileng karah sorkar hmalakna a chawl bik lo va, Chief Minister, Minister leh MLA te pawhin an hma zawnah theuh theihtawp an chhuah theuh a ni, a ti.
Dr. Beichhua chuan hrileng avanga ei leh barah harsatna kan tawh loh nan nikum lamah lo leh huan siam turin theihtawpa zirtirna a inpek thu tarlangin, Siaha *District Covid 19 Food Security Consultative Committee* anga an hmalaknaah pawh a bial chauh ngaihtuah bik lovin Leilet hectare 550 vel an leh sak zingah hectare 500 vel chu Tipa bial chhunga mi a ni, a ti. Tu nge thawk tam ber, tu nge thawk hlawk ber tih hi mitin kan thupui ni se, party anga inhnial reng thin te bansan tha a tih thu a sawi bawk.
Tipa khua *Eklavya Model Residential School (EMRS)* chu Pi Sangchhin Chinzah,Secretary SWD, Department Engineer te leh Contractor te nen en hovin, hnathawh duhthusam lo lai leh siamthat ngai awmte chu a rang lama siamtha turin hnahawktute an hrilh bawk.
EMRS Tipa hi kum 2016 hnathawh tan niin, kum 2019 October ah zo tura ruahman a ni a, harsatna hrang hrang avangin peihfel hun tur hi pawhsei a ni a, nakkum 2022 January thlaa hawn tura ruahman a ni. Hetihlai hian EMRS Tipa erawh kum 2020-2021 Academic Session atangin Class VI atanga Class IX thleng building dang hman hawhin class tan tura ruahman a ni a, Covid hrileng avanga Class tan theih a nih loh avangin Online in Class kal tan tir an ni. Tunah hian Zirlai 120, Teaching Staff 7 leh Non-Teaching Staff 8 an awm mek.
EMRS Tipa a tlawh hnuah Sericulture Minister ni bawk Dr. K. Beichhua chuan Siatlai khaw daia SEDP kaltlanga Sericulture department.hmalakna a enfiah bawk. SEDP hnuaiah hian Sericulture Department kaltlangin Siaha District ah Pangang khawi tanpuina chhungkaw 400 hnenah kumin June thla atang khan pekchhuah tan a ni.
Dr.K. Beichhua hian khawtlang hruaitute sawmna angin Tipa "V" PHC Building sak mek a enfiah bawk a ni. PHC building thar hi Rs cheng nuai 150 senga sak tura ruahman a ni a, Sak Zawh tep tawh a ni.
Ministry of Tribal Affairs kaltlanga Tipa "V" Centenary Higher Secondary School sak mek a tlawh bawk a, he School building sak nan hian Rs cheng nuai 250 ruahman a ni a, chhawng khat (groundfloor) sak zawh tawh a ni.
Social Welfare Minister chuan Saikao khuaah Ministry of Tribal Affairs atanga Lakher Pioneer Mission, Missionary te hmunhma humhalhna tur, *Preservation of Heritage Land at Saikao*, project hnathawh tur engineer te nen an enfiah nghal bawk. He project kalpuina atan hian Rs cheng nuai 560 ruahman a ni. He project hnuaiah hian Museum, Open Air Theatre, Prayer Hall, Solar Lighting System, Approach Road leh Water Reservoir te siam tura ruahman a ni.
Social Welfare Minister Dr. K.Beichhua hi Social Welfare Secretary Pi Sangchhin Chinzah, AH&Vety Director Dr. H. Laltlanmawia, Women & Child Development Department Director Pi Lallianpuii leh official dangten an tawiawm a ni.
Attachment
- Loading attachment...
