No.3091/2021-2022
Aizawl 22nd November 2021: MP(LS) Pu C. Lalrosanga chuan vawiin khan Aizawla BSNL hmun tlawhin General Manager Pu Arun Kumar leh a thawhpuiten an lo dawngsawng a, thil pawimawh hrang hrang, Mizoram chhunga BSNL hnuaia inbiakpawhna lam tihthat dan turte a sawipui.

BSNL General Manager chuan 4G khawl thar an neih thuai tur thu sawiin hei hian inbiakpawhna lam a tihthat tur thu leh BSNL hian FTTH hmangtu pawh 8300 lai an nei tawh a ni tih a sawi a. Internet tihchangtlunna tura Bangladesh atanga Internet Gate Way/Internet Traffic hrui pawh hna zawh tawh chu tunah hian enchhin mek a ni tih MP chu a hrilh.

Pu C Lalrosanga chuan BSNL kaltlanga Mizorama inbiakhmuhna lam tichangtlung tura Mizorama BSNL hotute mamawhte chu an hmunpui lama hotute hnenah thlensak a tum thu a hrilh a ni. Pu C.Lalrosanga'n BSNL a tlawhnaah hian Telecom Advisory Committee Member Pu H.Vanlalrawna leh Pu H.C.Vanlalruata ten an tawiawm a ni.

Hemi hnu hian MP Pu C.Lalrosanga chuan Assam Rifles DIG Brigadier Digvijay Sing chu kawmin, Aizawl atanga Assam Rifles sawnchhuah dan tur thute leh Myanmar nena inrina hrula Assam Rifles hote hnathawh dante a sawipui bawk a ni.