No.3090/2021-2022
Aizawl, the 22nd November, 2021: Vawiin khan Aizawl District Level Task Group on Covid-19 chu an Chairman Aizawl D.C. Dr. Lalhriatzuali Ralte kaihhruaina hnuaiah DC’s Conference Hall-ah an thukhawm a, Aizawl District chhunga hrikai dan te leh Krismas/Kumthar hunpui lo thleng turah mipuite inkaihhruai dan tur an sawiho.

Task Group Chairman Dr. Lalhriatzuali Ralte chuan Aizawl District chhunga hrikai dan positivity rate (ni 1.11.2021 atanga 21.11.2021 chhung) chhutchhuahah a landanah chuan test zat mi 45308 zingah 5264 positive hmuhchhuah a ni a, positivity rate pawh 11.62% niin a la hniam vak hran lo a ni a ti a. Sikul leh Camping Centre thenkhatah positive engemawzat hmuhchuah a nih chu pawi a tih thu leh anmahni viltu medical team, doctor leh nurse te chuan engtiklai pawhin uluk takin an thlithlai reng thu a sawi bawk.

Vawiin meeting-ah hian zai leh ruaitheh chungchang pawh sawiho a ni a. Pathian Biakin inkhawma zai leh krismas/kumthar lo awm tura ruaitheh duh leh duhlo survey neih a ni a, LLTF-ten an vengchhunga kohhran hrang hrangte rawn chungin report an rawn siam a, Local Council 83 atangin 53-in report an thehlut a ni. Heng report rawn luta duhdan chi hrang hrangte Task Group Member-ten chipchiar takin an sawi hnuah, hrikai positivity rate chu a la him tawk lo anga a lan avangin fimkhur zel tha an ti.

Vawiina Aizawl District Task Group on Covid-19 in a thurel pawimawh zual tlangpuite chu :-
1. Biakin a zai chungchangah tualchhung kohhran leh LLTF inrawnin an kutah dah nise, State Level-a Advisory tihchhuah zawm tura ngenna siam leh nise. Tin, Biakin a mask vuah leh biakin pawna CAB zawm a nih theih nan LLTF leh Kohhran te thawkho a tun aia kan fimkhur lehzual nan hmala tura ngen ni se. Heng zai chungchang hi State Level Task Force emaw SEC ah rawtna thlen nise tih a ni.
2. Krismas ruaitheh chu State thurel ngaichan nise.
3. All Mask Campaign hi December thla chhung hian neih leh ni se. Hemi hunah hian khauh leh zuala mask vuahlote vuah tura inzirtirna leh zawm tir nise, a tul dan anga executive duty te dah leh nise.

Chief Minister’s Relief Fund (CMRF) hi Phase-VI bakah 4C tanpuina semchhuah a ni tawh a. AMC chhungah Rs.4,97,35,000/- leh AMC pawnah Rs.26,14,000/- Deputy Commissioner, Aizawl kaihhruaina hnuaiah Incident Commander kaltlangin semchhuah a ni. Corporate Social Responsibility (CSR) kaltlangin Covid-19 dona kawnga hmanrua chi hrang hrang dawn a ni tawh a, mamawh leh tulna hun apiangah sem thin a ni. Fairelbel Charity Programme kaltlanga mi harsate hnena tanpuina atan Rs.23,45,000/- hi Fairelbel Organising Committee hnen atangin dawn a ni a. A semdanah rel turin Fairelbel Utilisation Committee din a ni. Phase-I a semchhuah hi Rs.12,05,000/- niin, YMA Branch 51 hnenah hlan a ni. Phase-II ah Rs.8,87,635/- semchhuah a ni.

Fairelbel Utilisation Committee-in a rel angin, tanpui ngai list hi Veng tin YMA kaltlangin khawn a ni a. Tanpui ngai hi Category A leh B-ah then a ni a, Cateory-A hi Rs.10,000/- leh Category-B Rs.5,000/- a tanpuina pek a ni, Heng bakah hian SW&TA Department kaltlanga dilna lutte, medical bill senso tum sak ngaite, ZMC Poor Fund leh adt hnenah tanpuina pek a ni.