No.3089/2021-2022
Aizawl, the 22nd November, 2021: Khawzawl District Bawrhsap Pu C.C. Lalchhuangkima chuan vawiin khan tukin dar 9:35 vela Pik-Up accident vanga Aiduzawl khaw mi paruk boral leh hliam tuar mi sawmpakhatte chu Rabungah kalin a tlawh. Ruangte puanin a tuam a, an chhungte hnenah ralna a hlan bakah hliam tuarte tlawhin kanna pawisa fai a hlan a ni.

Tukin dar 9:35 vel khan Aiduzawl atanga Rabunga mitthi vui tura kalte chuanna Pik-Up motor chuan kawnglakah accident a tawk a, he chhiatnaah hian vanduaithlak takin mi parukin nunna an chan a, hliam tuar mi sawmpakhat an awm bawk. Mitthi leh hliam tuarte hi Rabungah lak phei nghal an ni a, hliam tuar zinga mi pariatte chu Aizawlah refer an ni a, dinhmun ngaihtuahawm an awm nual a ni.

Chhiat tawh thu hriat a nih ve leh hian Khawzawl District Bawrhsap Pu C.C. Lalchhuangkima leh Additional DC Pu Lalrohlua te chuan Khawzawl atangin Rabung an pan nghal a. Rabung Primary Health Centre a hliam tuar awmte tlawhin Rs. 1,000 (cheng sangkhat) theuhin an kan a. Rabung YMA Hall-a accident vanga boralte an dahna pawh tlawhin, mitthi chhungte hnenah ralna pawisa Rs. 3,000/- (cheng sangthum) theuh an hlan bawk. Hemi bakah hian Rabung leh Aiduzawl VC te hnenah a tul apianga hman turin Rs. 5,000/- (cheng sangnga) leh silpaulin panga ve ve hlan a ni bawk.

Khawzawl DC chuan chhiat tawkte a tawrhpui thu sawiin, a tulna apiangah theihtawp chhuah a inhuam thu a sawi a. Aizawla refer-te phurh thlak dan tur chungchangah Rabung leh Aiduzawl VC te nen ruahmanna an siamho nghal bawk a ni.

Bawrhsap leh Addl. DC te hi Khawzawl atangin Pu H. Lalramenga, Sub-Deputy Commissioner leh DC office a thawk thenkhatten an tawiawm a ni.