Social Welfare, Excise & Narcotics, Sericulture leh AH&Vety Department – te changtu Minister of State Dr K. Beichhua chuan nimin leh vawiin khan Lunglei District-a a Department chan hnuaia hmun pawimawh leh office te a tlawh.

Nimin khan Dr K. Beichhua hian Social Welfare Department hnuaia Eklavya Model Residential School, Pukpui, Remand Home, Ramthar, One Stop Centre, Serkawn te tlawhin helai hmuna hnathawkte chu an inrelbawl dan leh inkaihhruaina bakah hmasawn zel tura an mamawhte a sawipui a. Helai hmuna thawktute hian an harsatna leh mamawhte lo thlenin, a tul anga hmalak sak a tum thu Minister hian a sawi. Lunglei District Social Welfare Office, Zotlangah Department a hnathawkte meeting tawi neihpuiin Minister chuan anmahni zawn theuha thahnemngai taka thawk tur leh mipui rawngbawltu pawimawh tak an ni tih hre reng turin a chah.

Tukin zing khan Dr K. Beichhua hian School of Vety Science & AH, Lungpher Farm, Lungpuizawl, Lunglei a tlawh bawk a. HPC Vice Chairman Pu Lawmawma Tochhawng leh Lunglei South bialtu MLA Dr K. Pachhunga, official-te leh MJA Lunglei hruaituten Minister hi an tawiawm a. Helai hmuna Principal Dr Lalrinpuii Sailo leh AH&Vety official dangten lo dawngsawngin Lungpuizawla ar vulhna hmunpui ‘Hatchery and Poultry Farm’ buatsaihna tur hmun te an enfiah a. Helai hmun hi Mizoram chhimlam District-te chawm thei tur leh arsa leh artui lama anlo intodelh theihna tura AH&Vety Department in a ruahman niin hna thawh tan thuai a nih theihnan Minister hian Department hotute ruahmanna a siam pui. Hemi hnu hian bawng vulhna, vawk vulhna leh Boar Semen Station te tlawhin helai hmun tih changtlun zel dan tur a thawktute a sawipui a. Taima taka hnathawk chhunzawm zel tur leh an mamawhte inthlahrung hauh lova a hnena thlen vat thin turin a chah bawk a ni.

Minister hian Lawngtlai leh Siaha District te tlawh turin vawiin vek khan Lunglei a chhuahsan a ni.