Vawiin chawhma khan Land Revenue & Settlement Minister Pu Lalruatkima chuan a Office-ah LR&S Department hnathawkte kovin an Department hmalaknate a sawipui a. He hunah hian LR&S hmalakna awm mek te leh hnathawh chhunzawm dan tur te sawiho a ni.

LR &  S  Official te fuihna thu sawiin Minister Pu Lalruatkima chuan sawrkar hnathawkte chu  rinawm, thahnem ngai leh phur tak chunga mipui rawngbawl hna kalpui tura beisei an ni a ti a. Puih ngai apiangte pawh hawihhawm tak chung leh inhuam taka lo dawngsawng thin turin a chah a ni. Decentralisation of Power chu a tul anga kalpui tha a tih thu sawiin ram chungchanga thil buai tam ta lutuk pawh thil veiawm tak a ni a ti. Pu Lalruatkima chuan Revenue Department kalphung ennawn ngai te pawh ennawn a nih tur thu a sawi a. Department Official te chu ram chungchanga thil buai te chu dan tlawh chhanin dik taka chinfel tum tur leh an thiamna te hmang tangkai turin a chah a ni.