Vawiin khan Parish hall Kolasib ah Pi Vanlalawmpuii Chawngthu MoS Fisheries, Cooperation etc chuan RD Department huaihawt Regional SARAS Fair-2017 a hawng.

Khuallian chuan thu sawiin Sawrkar hmalakna hrang hrangte hlawhtlinna chu mipuite kutah thui tak a innghah thu a sawi a, Sawrkar in a kawng tur a kawhhmuh tawh chuah rinawmna leh taihmakna nen bawhzuia hlawhtlinpui ngei chu mipui te mawhphurna a nih thu a tarlang a ni. Pi Vanlalawmpuii chuan Mizoram chu ringtu tamna, inkhawm tam hnam leh Pathian thu hre hnam kan ni a, Rinawmna chu kan nunpui tur a nih laiin Sawrkar atanga hamthatna dawng tam takte chu Rinawmlohna avangin an hlawhtlinpui loh thu a tarlang bawk a, hei hi a bik takin NLUP ah a tam hle tih a sawi a ni. Tanpui tlaka Taima leh Rinawm kan nih a pawimawh thu sawiin Pathian thu chu biakin leh a chhehvel ah chauh nilo  in kan nitin nuna a taka kan nunpui a pawimawh thu a sawi a. Dil chhuah leh sawi chhuah ringawt nilovin a thawhchhuah hi kan uar tur a ni tiin Rinawmna, Taimakna leh Tanrualna kan nunpui tlat chuan hlawhtlinna a awm thin a ni a ti bawk a. Regional SARAS fair chu kalkhawm te chuan an hlawkpui leh tangkaipui ngei a beisei thu sawiin kum danga SARAS Fair an hman leh na zel turah pawh hmasawn zel turin duhsakna a hlan a ni.

Hawnna inkhawm hi Pu Zarzosanga DC, Kolasib in a kaihruai a, Parish Hall a hawnna inkhawm neih a nih hnu in Venglai Bazar Shed ah Ribbon chep chatin Pi Vanlalawmpuii Chawngthu chuan a hawng a ni. Pu Lalnunhlua Project Director, DRDA , Kolasib chuan SARAS Fair chungchangah report a pe a, tun tuma SARAS fair chu a vawi 3 na a nih thu tarlangin 2015 atanga hman tan a ni a, Kolasib chu State Capital Aizawl ti lo ah chuan Mizoram District Hqrs a SARAS Fair thleng hmasa ber tu a nih thu a tarlang a ni. Tun tum ah hian Stall chi hrang hrang 50 a awma, Mizoram chhunga RD Block hrang hrang atangin Self Help Group (SHG) te dehchhuah leh tharchhuah thil chi hrang hrang  pholan a ni.

Hawnna inkhawm hi Pi K Lalrinzuali. Addl Secretary RD Department, Pi H Lalchhandami , Chief Executive Officer, Mizoram State Rural Livelihoods Mission (MzSRLM) leh RD Department hnuaia Officer leh thawktu hrang hrangte leh mipui thahnem takin an chhim a ni.