2984/2023-2024

Aizawl, 11th December, 2023 : Vawiin khan Minister of State Pu B. Lalchhanzova chuan a pisa thar a luah lut a, amah tawiawmtute nen Pathian hnena lawmthu sawina hun an hmang. Minister pisa thar hi MINECO old building first floor (Room no. 107 & 108) ah a awm a ni.

Pu B. Lalchhanzova chuan Pathian leh mipuite duhsakna zarah thlan tlina a awm leh Minister of State dinhmun pawimawh tak luah thei dinhmuna a ding chu lawmthu a sawi a. A hna chanpual chu huphurhawm hle mahse Pathian tanpuina in sawrkar hna thawk leh mipui tawiawmna nen tha taka hlenchhuah theih a inbeisei thu a sawi a. A kova tla Department pahnih te enkawl dan tur pawh mumal taka ruahman thlap a nih tawh thu sawiin theihtawp chhuah a tum thu a sawi a ni.

Pu Chhanzova chuan Revenue Minister a nih chang chawi a inhmun, lo/ram a hnena tawktarh lo turin hetiang ti thei chin te a chah nghal a, Revenue Minister a nih chhungin a hming emaw, a nupui fanaute hmingin emaw inhmun, lo/ram inches 1 pawh an neih thar dawn loh thu Zoram mipuiten lo hriatsak se a duh thu a sawi bawk a ni.

Pu B. Lalchhanzova hian Food, Civil Supplies & Consumer Affairs leh Land Revenue & Settlement a enkawl dawn a. Vawiin programme tawi buatsaihah a nupui fanaute bakah AMC Councillor Christina Roluahpuii Sailo leh Pu Bualhranga (VUC member) te nupa in an tawiawm a, amah lawmpuitu thian tha mi engemawzat an kalkhawm. Hunserh hi Chhinga Veng Presbyterian kohhran Upa S.Lalthanga’n a hmang a ni.

Vawiin chawhnu dar 2 khan Minister hian Food, Civil Supplies & Consumer Affairs Department official te a pisa ah a kawm a, dar 3 khan Land Revenue & Settlement Department official te a kawm leh bawk a ni.