Vawiin khan Mizoram sorkar thara Animal Husbandry & Veterinary, Disaster Management & Rehabilitation leh Printing & Stationery Department-te enkawltu tura ruat, Minister of State Pu C.Ngunlianchunga chuan a office a luah tan.

Minister chuan he dinhmun chelh thei tura hruaitu Pathian leh hotute leh mipuite duhsakna avangin lawmthu a sawi a. A department enkawl tur te chu kalphung ngai ring reng lova, ram a intodelh theih nana mahni mawhphurhna theuh hlen tura fuihin, “Kanhmazawn theuhahkanphak tawk leh tlin tawkin, ram leh mipuite tankanthawk theuh tur a ni,” a ti. 

He hun hi AH&Vety Director, Dr. L.B.Sailo chuan kaihruaiin, Rev. A. Khawlremmawia’n hunserh a hmang a; Lai Autonomous District Council atangin Pu Lalneihkunga, Executive Member; AH&Vety, DM&R leh Printing & Stationery Department-te aiawhin Dr. L.B.Sailo, Director; Pu P.C.Lallawmsanga, Principal Secretary leh Pu H.Laizika, Controller ten thu an sawi a; he hun hi LADC-a MDC-te, a enkawl department pathuma hotute, LIKBK hruaitute bakah chhungkhat laina leh thenrual thaten an hmanpui a ni.

Pu C. Ngunlianchunga hi MLA inthlan neih zawk takah khan Lawngtlai West Assembly Constituency atanga thla tlin a ni a; Lawngtlai Bazar Bial atangin VC-ah term hnih, LADC-ah term nga thlan tlin ni tawhin; LADC-a CEM office luah zawm thei awmchhun a nih bakah, Lawngtlai West Bial atanga MLA thlan tlin tawh zinga Minister hmasa ber a ni bawk.