Vawiin tlai dar 4:00 khan UD&PA, Sports & Youth Services etc,. changtu Minister Pu Zodintluanga chuan AR Ground, Aizawl a Football Stadium sak hna UD&PA Department in a thawh mek chu a tlawh in a endik a. UD&PA Director Pu K.Lathawmmawia, PHED a SE Pu Liantluanga leh Engineer ten Minister hi an lo dawngsawng a, Stadium sak hna an thawh mek leh hmabak te an lo hrilhfiah a ni. Minister chuan January 27 a Santosh Trophy Mizoram in a thlen hma a Stadium hi peihfel hman tur in hnathawktu te hi a hrilh.

UD&PA leh Sports Department changtu Pu Zodintluanga, Minister chuan Stadium changtlung tak UD&PA in a sa thei chu hlawhtlinna mellung pawimawh tak, infiammi tan chauh nilo, Mizoram tan thil lawmawm tak a ni a ti. He stadium hi kan tu leh fa te thleng tan pawh tangkai taka hman a nih zel theih nan Zoranm mipui ten kan enkawl uluk a, kan duatthiam a ngai a ni a ti a. Kan hma lawk ah rampum huap tournament lian Santosh Trophy kan thleng dawn a, kan Stadium vawnfai kawngah leh thutna te kan enkawl that danah te Mizoram hmel ti bal lo turin inkhel entu te a ngen bawk a ni.

UD&PA Department hotute chuan Stadium chu peihfel thawkhat a nih tawh thu an sawi a. Security fencing siam mek a ni a, tui connection leh inthiarna tur te pawh peihfel hman a nih theih nan PHE Department in chak takin hma a lak mek thu an sawi bawk a ni.