2990/2023-2024
Aizawl, 11th December, 2023 : Vawiin khan Minister of State Pu F. Rodingliana chuan a pisa thar a luah lut a, Pathian hnenah inhlanin lawmthu sawina hun an hmang a ni. Minister pisa thar hi MINECO old building first floor (Room no. 103 & 104) ah a awm a ni.

Pu F. Rodingliana chuan Pathian leh mipuite zarah ram roreltu pawimawh tak dinhmun a luah tih sawiin, Mizoram hmasawnna atan theihtawp a chhuah dawn tih a sawi a. Minister of State dinhmun pawimawh tak a luah thei chu a hna zahawm a tih bakah amah pawh chona thar petu a ni tih sawiin, Pathian rinchhan tlat chung leh mipuite tawiawmna telin; Zoram tan malsawmna thlentu nih ngei a tum thu a sawi bawk a ni.

Pu F. Rodingliana hian Power & Electricity, Commerce & Industries leh Printing & Stationery Department te a enkawl dawn a. Vawiin programme tawi buatsaihah a nupui fanaute, a chhungte bakah Lunglei North bialtu MLA Pu V. malsawmtluanga leh amah lawmpuitu thian tha mi engemawzat an kalkhawm. Col. Lalhmingliana, Territorial Commander, India Eastern Territory (The Salvation Army) chuan hunserh hmangin fuihna thu a sawi a. Lt. Col. Lalliankunga’n a lu chungah hriak thiha kut nghatin Pathian malsawmna leh  kaihhruaina a dil sak a ni.