2991/2023-2024

Aizawl 11th December, 2023 : Vawiin chawhma dar 10:30 khan Pu Lalthansanga, Environment, Forests & Climate Change, Sericulture, Fisheries leh Land Resources, Soil & Water Conservation Deptt. changtu Minister chuan a Office MINECO Block A ground floor Room no. 009 & 010 chu a luah lut.

Minister Pu Lalthansanga Office luah lut hi Pu Lalchhuanthanga, MLA, Aizawl South 2, Pu H. Ginzalala, MLA, Champhai North leh Pu Clement Lalhmingthanga, MLA, Champhai South te'n an tawiawm bakah Officials te, Val Upa Council hruaitute, a nupui leh a thiantha leh chhungkhat laina te'n an telpui.

Minister chuan ram hruaitu nih chu a tum em em vang ni lovin Pathian khawngaihna vang liau liau a ni a ti a. Minister dinhmun hial a chelh chu lawmawm a tiin lawmthu a sawi tak meuh meuh a. Pathian chu engkimtithei a nih angin kan Bible chu rinchhan a, innghah ngam a pawimawh thu kalkhawmte hma-ah hian a sawi a. A Department enkawl tur pali te chu Department pawimawh tak tak a nih angin Project siam kawngah pawh tanlak nasat a ngai dawn hle a ni a ti a. A department enkawlna hnuaiah eirukna leh hlemhletna a rem loh tur thu sawiin a pa thuchah pahnih eirukna-a a inhnamhnawih chuan a tuithlar tur thu leh a pa thlah a nih zel a rem tawh loh tur thu avang pawhin eirukna kawngah a inhnamhnawih ve ngai loh tur thu a sawi a. Zoram mipuite tawiawmna a ngen nghal bawk a ni.

He hunah hian amah tawiawmtu MLA pathumte bakah Pu Haukhuma Hauzel, Mizoram CS hlui, a bial chhunga khawtlang hruaitute, Pensioners leh Minister laina hnai te atangin lawmpuina leh fuihna thu sawi ngaihthlak a ni bawk.

Office luahluh tanna hunserh hi Upa Zothlamuana'n a hmang a. Rev. Dar Chungnunga, Val Upa Council a mi chuan tawngtainain hun a khar bawk a ni.