Lunglei High Powered Committee bultum, chhim biala football torunament lian ber 5th HPC CUP 2015 Final Match chu vawiin khan Thuamluaia Mual, Lunglei-ah khelh a ni a; Minister of State, H&FW etc leh Mizoram Football Association(MFA) President ni bawk Pu Lal Thanzara chu Khuallian niin tournament kharna hun a hmanpui.

5th HPC CUP 2015 Final Match khelh hmain Khuallian Pu Lal Thanzara chuan thu sawiin Mizoten infiamna khawvelah hmasawnna nasa tak kan hmu zel hi Pathian malsawmna a nih rualin sports-a tui mi Chief Minister Pu Lal Thanhawla leh Sports Minister Pu Zodintluanga kan nei hi kan vanneih zualna a ni, a ti a. A bik takin, football-ah phei chuan Mizoram Premier League buatsaih tan a nih hnuah Mizo footballer-ten nasa takin hma an sawn zel a; kumin September thla atanga MPL buatsaih leh turah India player thaten Mizoramah rawn khel ve an chak a, hei hi Mizo football history-ah phei chuan a vawi khatna a ni dawn a ni, a ti. Rampum huapa football club liante inelna Indian Super League(ISL)-ah Mizo football player 12 zet an tel tawh a, chung zinga 3 te chu Lunglei District-a mi an nih chu a ropui hlein inchhuanna tham a ni, a ti bawk. Kum 2017-ah India-in FIFA U-17 World Cup a thleng turah India Team-a tel tur players an thlan tawhte zingah Mizo naupang 3 an tel tawh a, a dangte pawh enchhin turin India Team Coach chu a hranpa ngatin rawn kal leh a tum thu a tarlang bawk a. I-League standard pha turin Rajiv Gandhi Stadium, Mualpui chu chei tum a nih thu sawiin Pu Lal Thanzara chuan thawmthat hna zawhfel hnuah Mizoram-in ISL thlen ve kan dil ang, a ti. Lunglei District-in High Powered Committee a nei chu vanneihna a nihzia sawiin Pu Lal Thanzara chuan Lunglei HPC kaltlangin sorkarin chhimbial chawikanna turin sum tam tak a thawh thin a, heng hi Lunglei mipuite chuan chhawr tangkai zelin tunah chuan hlamchhiah nia inhriatna te a bo tulh tulha a hriat thu a sawi a; Aizawl pawhin a neih phak loh infiamma lam thil tha tam tak District-ah te zawk dah a ni tawh tih a sawi bawk. Khuallian hian MFA hmingin Lunglei District Football Association(LDFA) hnenah football 3 leh Asst.Referee flag set 1 a hlan nghal bawk.

5th HPC CUP 2015 Final Match leh kharna inkhawm hi Lunglei HPC Vice-Chairman Pu S.Laldingliana’n a kaihruai a, he hun hmanpui tura lo kal Pu Lal Thanzara leh amah zuitu MFA officials te chungah lawmthu a sawi a. HPC Cup 2015 hlawhtling taka neih a nih theih nana tha leh zung sengtu LDFA hruaitute leh officials zawng chungah lawmthu a sawi bawk. Kumin HPC Cup Tournament bultan dan leh khelh chhoh dan report chu LDFA Hon.Secy. Zothanzuala-in a pe a. He hunah hian Lunglei District Sports Council leh LDFA atangin F.Zohmingthangi(National Referee) , Lalduhthlani(Player, National Sub-Junior) leh C.Lalchungnunga(Sub-Junior, Coca-Cola Cup) te hnenah chawimawina Citation hlan a ni bawk.

5th HPC 2015 Final Match-ah hian nikuma Champion Electric V/C Team leh Zotlang V/C Team te an intawk a, Electric V/C Team hi 3-2 in an chak a, Khuallian Pu Lal Thanzara chuan 5th HPC Cup Champion Electric V/C Team te hnenah Trophy a hlan nghal a ni.