Parliamentary Secretary Pu K. Lalrinthanga chuan tukin zinga Champhai Sub-Division Horticulture Office leh Nursery bakah District Local Administration Department Office a tlawh hnuin Khawzawl-a Pre-Kharif Awareness Campaign Programme, District Krishi Vigyan Kendra (KVK), Khawzawl bultuma buatsaihah khuallian a niin a hmanpui a. He Programme neih ruala kuthnathawktute tan anmahni chin leh thar chhuah exhibition buatsaiha titha zual pathum te hnenah lawmman a hlan nghal bawk.

Khuallian chuan Sorkar hmalakna inhrilhhriatna hun pawimawh tak mai Pre-Kharif Awareness Programme chu a bik takin kuthnathawktuten tangkai taka an hman a duh thu a sawi a. Sorkar chuan kawng hrang hrangah ram kalphung tha neih theihna tur hian hmala chhovin kuthnathawktute din khawchhuahna turin NLUP a kalpui a, zirna lamah te, infiamna lamah te pawh Sawrkarin nasa takin hma a la a ni tiin,  zirna lamah tunhma zawng aiin HSLC, HSSLC leh College-ah te kan Result a tha tawh zawk a, infiamna khawvelah pawh kan thleng sang tawh hle a ni, a ti.

Vawiina exhibition neihah kuthnathawktute tan anmahni chin leh thar chhuah - thlai, thei leh pangpar chi hrang hrang 17-ah te inentirsiak a. Thlai inentirsiakna neihahhawzawl khawchhung bakah khaw chhehvel khaw hrang hrang atangin loneituten an thlai, thei leh pangpar thar chhuah te an pholang a. KVK lamin ei tur hrang hrang an siam te an phochhuah bakah loneituten an harsatna tawhte mithiamte zawhna hun an hmang a, AH&Vety Department pawhin a thlawn a ran damlo entirna buatsaihin Ui leh Ar tan Vaccine a thlawnin an sem bawk.

Parliamentary Secretary hian tukin zing khan Champhai Horticulture Sub-Division office a tlawh a. Thawktute nen inkawmna hun a hmanna ah Mizo kuthnathawktute eizawnna nawlpui chu horticulture-a innghat a ni tiin, Department thawktute chuan an mawhphurna chan chu hre reng chungin thahnemngai taka thawk zel turin a chah a. Sorkara innghah pumhlum loh kan zir a tul tawh tak zet a ni tiin Pu K. Lalrinthanga chuan thlai chi pawh state pawn atanga kum tin lak luh ngai lovin mahni thlai thar atanga a chi tur a then kan zuah chuan intodelhna kawng tak tak kan zawh dawn a ni, a ti.

Parliamentary Secretary Pu K. Lalrinthanga hian Champhai Horticulture Nursery leh Model Floriculture Centre a enfiah nghal a. Tunah hian Nursery ah hian grape leh kiwi kui tiah mek a ni a, Floriculture Centre-ah hian rose chin a ni bawk. Parliamentary Secretary chuan Champhai DLAO office-a thawktute nen inkawmna hun tha tak a hmanpui bawk.