School Education Deptt Mizoram leh Doordarshan Kendra Aizawl te chuan vawiin khan thawh dunna tur thuthlung an ziak a, hei hi Mizoram sorkar leh Doordarshan in thawhdunna tur thuthlung an siam vawi khatna a ni.

Thawhdunna tur thuthlung hi School Education Minsiter Pu H Rohluna office ah ziahfel a ni a, School Education Secretary Pi Manisha Saxena leh Doordarshan aiawhin Programme Head Pu Ramsan ten an hming an ziak a. Thawhdunna thuthlung hnuaiah hian School Education Deptt chuan zirna chawikanna tur darkar chanve chhung awh programme chi hrang hrang kartin buatsaihin, hei hi Doordarshan ah tih chhuah thin a ni ang a, Education Deptt hnuaia programme siamtu turte chu Doordarshan chuan programme buatsaih dan inzirtirna, Workshop a buatsaih sak dawn bawk. Programme hi August thla atanga tihchhuah tan hman tum a ni.

Thuthlung ziahna ah hian School Education Minister Pu H. Rohluna chuan Doordarshan nena thawh dunna tur chu Mizoram sorkar leh Education Dept. tan hmasawnna mel lung pawimawh tak, zirna tih hmasawnna tura thil tangkai tak tur a ni a ti a, zirlaite hnena zirna pek piah lamah Dept hmalakna pawimawh zualte mipuite hnena phochhuahna tur a ni a ti. Parliamentary Secretary Pu Joseph Lalhimpuia chuan thawhdunna hnuaiah Dept. officer ten theihtawp an chhuah chuan zirlaite leh mipui nawlpui tan hmasawnna nasa tak thlentu tur a ni a ti. Inremna thuthlung ziahna ah hian Doordarshan lam atangin News Head Pu Mangjangam Touthang, Prog Executive Pu Vanlaltlana Varte leh F. Lawmsangi te an tel a ni.