Vawiin hian Lawngtlai DC Conference Hall ah nausen kum khat hnuai lam thihna leh nau chunga nu boralna pumpelh nana hmalak dan tur inhrilhhriatna hun (Awareness Campaign on Reduction of IMR/MMR) chu Lawngtlai khawpui chhunga Tlawmngai Pawl, Kohhran leh Sawrkar hnathawkte tan buatsaih a ni.

A hawnna inkhawm Dr. HC Thangkima, Chief Medical Officer kaihhruaiah, khuallian Pu R. Lalsangluaia, Addl DC chuan, fanaute hi malsawmna chungnung tak Pathian hnen ata kan dawn a ni. Amaherawh hriatlohna avangte, ngaihthahna avangte in fanau lo piangte chu kan hloh palh theia, nu zawk pawh kan hloh palh thei bawk. Chutiang ang chhiatna rapthlak kan tawh lohnana invenna kan hriat theih ang angte chu chiang taka kan hriat a tul hle a ni, a ti a. Khawtlang hruaitute leh Kohhran hotute chu an thil hriatte mipui hnena uar taka zirtir turin a ngen a ni.

Hemi hnu hian Dr. Lalchhuankimi, Child Specialist, Medical Superintendent, Lawngtlai Civil Hospital chuan naupai dawna inenkawl dan te, nau pai tirh atanga in enkawl dan tur te, nau neih hnua nausen enkawl dan te a sawifiah a; nau chunga nu thihna langsar tak mai chu naupai lai atanga nu taksa chaklo lutuk vang a nih thin thu sawiin chu mi venna damdawi tha ber chu sawrkarin a thlawna a sem Iron Folic Acid hi a nih thu a sawi. Nuin he damdawi pawimawh zia hi hre chiang se chuan ‘ka ei thei lo’ an tih phal a rinawm loh a ni, a ti a.

Pi Chhuankimi bakah hian Lawngtlai Medical Office leh Civil Hospital-a thawk, mi thiam hrang hrangten mipuite hriattur pawimawh tak tak te an sawi bawk a, chumi hnuah kalkhawmten an hriat duh leh zawhna an neihte chu sawi ho nghal a ni bawk

Tun dinhmunah India ram pum leh Mizoram huapa nausen kumkhat hnuai lam boral zat hi sangkhat zelah 45 a ni mek a, Lawngtlai District bikah chuan 42 a ni thung. Nau chunga nu boral zat hi Lawngtlai District ah nuai khat zelah 1 a ni mek bawk a ni.

He Programme ah hian sawm bik mi hrang 100 vel an tel a ni.