Sericulture Minister Dr. BD Chakma chuan vawiin khan Champhai Venglai Community Hall-ah hmeichhiate te tan a Sericulture lama hmalakna thar "Integrated Bi-Voltine Sericulture Development Project for Mulberry" chungchanga inhrilhhriatna leh zirtirna programme chu a hawng. Minister hi Pi. Lalsangpuii, Secriculture Department Secretary, Pu Lalrinmawia, Director; Pu RP Meena, Champhai SP leh Champhai Sericulture Department a thawktute leh official dangten an tawiawm a ni.

Minister chuan he Sericulture Development Programme-ah hian poisa leh hmanrua mamawh tur ang chu Sorkar laipuiin a tum vek tur thu sawiin, Mizoram-in a tum ve tur chu a thawktu ten rinawm leh taima taka an hna pual an lo thawh ve chu a ni, a ti a.  Sorkar chuan ti tak tak te tan chuan an mamawhte ngaihtuah sak chu a inhuam reng thu tarlangin, tuna Sorkar laipui atanga hamthatna lo chhuak pawh hi tithapeihlo thenkhatte avangin hnuh dawk leh mai a nih lo nan tih tak zetna nen thawk turin a sawm a. Hlawhtlinna tak tak an hmuh theih nan training-te pawh ngaithla tha a, mithiamte zirtirna te ngaipawimawh thin turin kalkhawmte chu a chah a. Hmeichhiate hamthatna ngaihtuah chung renga chhungkaw tana tangkai thei tak hmalakna duan a ni chu lawmawm a tih thu sawiin, hmeichhiate tana duan ni mahse hlawhtlin tak tak tur chuan chhungkua a tanrual a pawimawh tur thu a sawi bawk.

Vawiin hun hi Pi Lalsangpuii, Director, Sericulture Department chuan kaihruaiin, Pu Lalrinmawia, Sericulture Director leh Pu BN Choudhury, Scientist 'D', CSB ten thu an sawi a. Pu. Lalremsiama, Project Coordinator atangin he programme chungchang tlangpui hi ngaihthlak niin, Pu Lalrozama, Jt. Director, Sericulture chuan lawmthu sawiin hun tawp a siam a ni.

Champhai Block leh Khawzawl Block-ah te Integrated Bi-Voltine Sericulture Development Project hi Champhai District-ah chuan kalpui a ni dawn a. Project hi kum 3 chhung (2015-16 atanga 2017-18 thleng tur niin, project cost hi cheng nuai 3000 bawr vel a ni.

Sericulture Minister Dr. BD Chakma hian nimin (16.7.2015) khan Champhai a Sericulture Farm pahnih (Mulberry leh Oak Tasar) tlawhin, hnathawktute nen inkawmna hun a hmang a. Champhai a Oak Tasar silkworm rearing farm hi Mizorama awmchhun a ni.