Fisheries Minister Dr. BD Chakma chuan nimin (17.7.2015) khan Champhai a Fisheries Department hmunhma leh mimal sangha dil, department atanga hamthatna hmu engemawzat tlawhin a enfiah. Minister hi Fisheries Department Secretary Pu Lalthlamuana leh Joint Director SP Singh ten tawiawmin, Champhai District Fisheries Officer leh thawktu dangten an lo dawngsawng a ni.

Minister Dr. BD Chakma chuan sangha chingtute chu chik taka kawm in, an hmalak dan leh harsatna te a zawt a. Champhai kuthnathawktute chu taima a tih thu Minister chuan sawiin, tharchhuah hlawk tak nei zel tur chuan Department mithiamte thu ngaih pawimawh a tul a tih thu a tarlang bawk.

Minister hian sangha dil panga tlawhin, sangha chaw siam chhuahna tur Feed Mill Plant sak mek a enfiah bakah Fisheries Department residential complex a tlawh a ni. Feed Mill Plant sak mek hi Public Private Partnership (PPP) mode-a kalpui tur a ni a, Champhai District a sangha khawituten nasa taka an la tangkaipui beisei a ni.

Fisheries Department tarlan danin Champhai District pumah sangha khawitu mi 1451 awm in, an sangha khawina dil zau zawng belh khawm chu 348.90 hectare a ni a, kum 2013-14 chhung khan sangha tharchhuah zat chu 878.72 quintal a ni. NLUP hnuaiah 1st Phase atanga 4th Phase thleng Champhai District chhungah sangha khawi beneficiary 489 an awm bawk.