Land Revenue & Settlement-in ram ruaka chhiah a lak dan chungchang leh Aizawl Municipal Corporation-in ram ruaka property tax lak a tum chungchang sawi hovin vawiin (20th May, 2016) chawhma dar 11 khan Minister pahnih Pu R. Romawia leh Pu Zodintluanga te kaihhruainain LR&S Minister office-ah Land Revenue & Settlement Department leh Urban Development & Poverty Alleviation Department te’n joint meeting an nei.

Vawiina department pahnihte meeting neihnaah hian Land Revenue Act hnuaiah Land Revenue & Settlement Department-in ram ruakah chhiah a lak mek laiin, Mizoram Municipalities Act, 2007 hnuaiah ram ruakah tho hian property tax lak theih a nih dan te bakah India ram state hmun dangah pawh land revenue leh property tax te hi lak kawp a nih thin chungchang te sawi ho a ni a. Revenue Department chuan ram ruak dik tak chu sawrkar ram, mi mal kuta la hlan loh chauh a nih avangin miin land lease/pass a neih tawh chuan ram ruaka ngaih ni lovin neitu awm a nih tawh avanga property a nih dan te an sawi a. AMC hotute chuan property tax lak a nih chuan chu chhiah tling khawm chu Aizawl khawpui chei nan leh Aizawl khawpui tan municipal service improvement atan hman a nih tur thu an sawi. Hetih rual hian LR&S Department-in chhiah a lak zawng zawng chu sorkar sum bawmpuiah chhun luh a ni thung a, sawrkarin a hman dan tur chu ruahmanna hranpa asiamthung dawn a ni.

India ram state danga an lo tih thin angin Land Revenue Act leh Mizoram Municipalities Act hnuaiah hian chhiah khawn hi a theih ve ve nia a lan laiin mipuite tan phurrit a nih ve theih avangin sorkar department leh AMC hotute chuan mipuite tana harsatna siam chu tha lova an hriat ve ve avangin ram ruak, Revenue Department-in chhiah a lo lak tawhna hmunah chuan AMC hian property tax hi tun dinhmun atan chuan la ve rih lo mai se, UD&PA lamin hemi atan hian sawrkar order chhuah mai se, tiin Minister pahnih hova meeting chuan a rel.

Vawiina meeting-ah hian department officer pawimawh an tel kim hle a. Urban Development & Poverty Alleviation lam atangin Joint Secretary Pu Vanlalmawia, Joint Director Pu James Lalnunmawia, Under Secretary Pu Lalmuansanga Ralte, AMC Mayor Pu PC Lalhmingthanga, Deputy Mayor Pu Lalringliana leh AMC Commissioner Dr H. Lalthlangliana te leh officer dangte an tel. LR&S atangin Additional Secretary Pu Ramnghaka, Director Pu David  Lalthantluanga, Joint Director Pu Dawngkima, Deputy Director Pu Vanlalthiana te bakah, Law & Judicial leh Finance official-te pawh an tel a ni.