Mamit Officers club(MOC), disttict legal services authority leh SSA Mamit buatsaihin vawiin khan Chhim Veng YMA Hall-ah HSLC leh HSSLC a Mamit school atanga zirlai Distinction leh First Division a tithate lawmpuina hun leh Mamit khawtlang hmasawnna tur sawihona "Mamit Development Conclave" neih a ni.

He hun hi Pu H.Lianzela,President MOC in a kaihruaia, Pi Lalbiaksangi, district Bawrhsap chu khuallian niin zirlai titha te lawmpuina hi a hlan a ni.

Khuallian chuan zirlaite chu zirlaibu chauh lo lehkhabu chhiar hnem tura chahin,internet pawh a tangkai zawnga hmang turin a chah a. Hmalam pan zel tur an nih angin zirlai te chu tan la sauh sauh turin a fuih a ni. Pi Lalbiaksangi hian Anti-Terrorism Day puala thutiam lak tirna a nei nghal bawk.

Vawiin chawhma hunah hian Zirlai te chu thupui pahnih'career guidance' tih thupui hmleh 'cyber crime leh drug abuse'tih hmangin zirtirna pek an ni a, Pu Lalmuanpuia Sailo, Treasury Officer & Treasurer MOC leh Pi Julie Lalrinzami, CJM & Finance Secretary MOC ten zirtirna hi an pe a ni.

Chawhnu lamah hian "Mamit Development Conclave" neih a ni a, heta hian Mamit khawchhung hmasawnna tur a inrawnkhawmna leh sawihona neih a ni a. Mamit khawchhunga VC member tin te, YMA leh MHIP branch tin hruaitute,MUP unit tin hruaitu te, MZP,MJA,Sub Hqrtr YMA,MUP leh MHIP te leh sorkar official ten sawihona hun hi an hmang a ni. Thupui thlur bik pathum 'Human Resource Development', 'Infrastructural Development' leh 'Civic Sense & Social Life' hmangin sawihona hi neih a ni a. Hun hi Pu H.Lianzela,Addl.DC & President MOC in a kaihruai a ni.