Vawiin khan Finance Minister Pu Lalsawta leh Urban Development &Poverty Alleviation (UD&PA) Minister Pu Zodintluanga te’n Aizawl East-II bial chhunga Saron Veng leh Armed Veng Hall saklaite an tlawh.

Saron Veng YMA Hall-a function tawite buatsaihah thusawiin Pu Lalsawta chuan Mizoram hmun hrang hrangah Hall leh Indoor Stadium te sak mek a ni a, heng hmun te hi hmang tangkai a, taksa insawizawi nan leh thalaite’n humsual dai lova kawng dik an zawh theihna tur hmanrua a nih a beisei thu a sawi a. Sports leh games-a talent nei tha, infiam lama tuimite tan an talent tihpunna tur hmun rem chang niin ram chhung leh ram pawn thleng pawha Mizoram tihmingthatu an nih theih nana kawng hawnsaktu a nih ngei a beisei thu a sawi bawk.

Pu Zodintluanga pawhin thusawiin Mizoramah hmasawnna ruhrel din chhoh mek a ni a, din zel pawh sawrkar chuan a tum, a ti a. Hlawhtling tak tak tur erawh chuan sawrkarin infiammite tana kawng a hawnsak hi bawhpel lohva, taimakna leh thahnemngaihna nen theihtawp chhuaha mimalin tan an lak ngai a ni, a ti.

Saron Veng Indoor Stadium hi State Plan Assistance atanga hmuh cheng nuai 550 senga sak a ni a. Kar sawmhnih chhunga sak zawh tura ruahman hi kum 1 chhungin an zo fel dawn a, kumin September thla hian luah hman tura peihfel beisei a ni. He hall saklai hi chhawng thum a ni a, badminton court pahnih, inhmuhkhawmna room, Table Tennis leh games dang khelh theihna hmunte a awm dawn a ni.

Armed Veng Hall hi cheng nuai 650 senga sak niin October, 2015 atanga sak tan a ni a. Kum thar March 2017 ah zawhfel theih beisei a ni. Mizo chhiara chhawng thum niin basketball court, badminton court pathum, skill development room leh motor park-na hmun a awm dawn a ni.

Minister pahnihte hi Local Council member-te leh tlawmngai pawl hrang hrang aiawhte’n an tawiawm a. Hall saklai an en bakah mipuiin mamawh an neihte ngaithla in inkawmhona hun an hmang bawk.