Home Minister Pu R. Lalzirliana, I&PR Minister Pu Lal Thanzara leh DM&R Minister Pu C.Ngunlianchunga te chuan vawiin khan Hunthar Venga leiminna hmun tlawhin khawtlang hruaitute nen chhawmdawlna hna thawh dan tur leh hmalak dan tur te an sawiho.
Leiminna hmun hi Hunthar Veng lei tlak hniamna hmun kawngpui chhak lam niin August ni 12, 2016 (Zirtawpni) zana ruahsur vak atang khan lei a khi tan a, August ni 14, 2016 (Pathianni) ah khawtlangin leikhi vanga dinhmun hlauhawma ding mihring chenna in pahnih an thiat a, leikhi hi a nasat belh zel avangin nimin August ni 21, 2016 (Pathianni) khan mihring chenna in panga thiah leh niin tunah hian avaiin in pasarih chhungkaw 11 luah lai thiah a ni tawh a, leikhi huam chhuungah in la thiah loh a chengten an luah ngam tawh si loh vanga rauhsan chhungkaw 19 luah a awm bawk a, avaiin chhungkaw 30 in an chenna in an chhuahsan tawh a ni. Hei bakah hian Baptist Biak In pawh a dinhmun a hlauhawm avangin a chhunga bungrua te vawiinah thiarchhuah a ni bawk. Heng vanduaina tawktu chhungkua te zinga a tam zawk hi BPL chhungkua an ni.
Chief Minister aiawh a kal Home Minister Pu R. Lalzirliana chuan khawtlang hruaitute hnenah Sawrkarin theihtawp a chhuah thu sawiin naktuk hian Shillong atang Geological Survey of India mithiamte Hunthar Veng lei tlahniam zirchiang tura an rawn thlen tur thu leh a tul dan azira cham deuh tura an rawn inbuatsaih thu a sawi a, inthiahsak ngaite leh luah ngam loh vanga chhuahsan te pawh Sawrkarin chhawmdawlna awm thei ang ang a pek tur thu sawiin BPL chhungkuate pawh arang thei ang bera UD&PA Minister leh hotute nen inberawn a Aizawl hmun hrang hranga BSUP scheme hnuaia BPL chhungkuate chenna tura in sak ah dah luh dan dap anih tur thu a sawi a; Ramhlun Vengthar lei tlahniam vanga Sawrkarin inbenbelna tur a siamah in an sa duh ngyhal anih chuan an tan hmun a awm theih tur thu pawh sawiin in an sakna tura an mamawh zualpui pawh ngaihtuah sak anih dawn thu a sawi bawk a ni.
Bialtu MLA Pu Lal Thanzara pawhin theihtawp chhuah a hma lak ani chungin khuarel chhiatna ah hi chuan tih theih a tam lo hle a, kum hmasa lamah PWD leh DM&R Department ten tuihawk paihna leh tui luan kawr tha tak an siam te pawh ruahsur nasat avanga lei che a nasat em avangin awmze nei hleithei lovin a awm a ni a ti a, a bial chhunga harsatna an tawh chungchangah Veng hrang hrang leh sawrkar department hrang hrang ten an tanpuina leh an tawrhpuina ah lawmthu a sawi bawk a ni.
Disaster Management & Rehabilitation Minister Pu C. Ngunlianchunga pawhin Sawrkarin a theihna zawng zawng sengin Hunthar Veng leitlahniam tih reh dan tur a ngaihtuah a, GSI mithiam ten uluk taka an zirchian hnu ah thil awmdan dik tak a hriatchian theih a beisei thu leh hmalak dan pawh awmze nei lehzuala kalpui anih theih a beisei thu a sawi a, leikhi in a huam chin a ramneitu te pawh an khawtlanginn harsatna an tawh te hrethiama rilru zau tak leh inhawng taka an ngaihtuahna te seng turin a ngen a, Sawrkarin Hunthar Veng chhiat tawhna chu pawi a ti takzet a ni a ti bawk.
Bialtu MLA Pu Lal Thanzara hian Hunthar Veng leimin buaipuituten an mamawh apianga an hman turin Rs. 15,000/- a pe tawh a, DM&R Minister Pu C. Ngunlianchunga pawhin Silpauline thahnem tak leh Rs. 10,000/- Hunthar Veng YMA te hnenah a hlan a ni.
Hunthar Veng khawtlang hruaitute chuan an harsatna tawh chungchangah Sawrkar hotute, thuthar thehdarhtute leh Veng hrang hrang YMA ten an ngaihsak avangin lawmthu an sawi a, nimin lamah pawh Vaivakawn, Chanmari West, Dinthar, Dawrpui Vengthar, Chawnpui, kanan leh Zotlang Branch YMA ten nilengin an pui a, Hunthar Veng thalaite pawh tlaivara duty in harsatna thleng thut thei lakah an in ralring reng a ni. Chenna in rauhsan tu te awmdan tur pawh Hunthar khawtlang hruaituten ngaihtuahin an zinga chhungkaw pali chu Company penga Legal Metrology buildingah awm lailawk tir an ni a, chhungkaw dang pakhat chu Hunthar Veng MHIP Hall ah dah an ni a, Chakma House ah te a then awmin; a remchan dang ang angin chhungkaw hrang hrang belin an sem darh rih a ni.
