Vawiin chawhnu khan UD&PA leh PHED changtu Minister Pu Zodintluanga hovin a pisaah UD&PA, PHED leh PWD Secretariat leh Department thawktute chuan Atal Mission for Rejuvenation and Urban Transformation (AMRUT) hnuaia hmalakna an kalpui mek dan thlirhovin an thukhawm.He hun hi Parliamentary Secretary Pu Hmingdailova Khiangte chuan a telpui a ni.

Minister Pu Zodintluanga chuan he Mission hnuaia Line Department-te chu langtlang taka thawhhona tha nei a, khawpui fai leh entawntlak kan neih theih nan thahnemngai taka ngaihtuahna hmang a thawk turin a chah a. Minister chuan Sorkar laipui lam an inhawng hle a ni tiin, hna an thawh chak chuan Sorkar laipui lam atangin sum a haw chak mai dawn a ni a ti a, tan la deuh deuh turin Department pathum te chu a chah a ni. Khawpui tihhmasawnna atanga Sorkar laipuiin Mission Programme a duan panga zing ami AMRUT hnuaia hna kal mek te vawiin hian sawiho a ni a.

Khawpui chhung tuisemna ah pipe leh tuiherhna atanga tui leak te siam tha a hna thawh mek anih thu te, tui kawr (drainage system) leh sewage management hmalakna leh harsatna tawh te awiho a ni bawk a. Mission programme panga zing ami pakhat - Housing for All hnuaia hmalakna kal mek chungchangah report ngaihthlak a ni bawk.

AMRUT hi June 25, 2015 khan Central Sorkar-a Ministry of Urban Development (MoUD) chuan a hawng a. He Scheme hi a bul tanna atangin Mizoram State chuan Service Level Improvement Plan (SLIP) leh State Annual Action Plan (SAAP) siam kawngah a thawh chak hle avanga India ram State zinga Central Apex Committee-in a approve hmasak pawl a ni a. 2015-16 leh 2016-17 atana AMRUT hnuaia Project sum belhkhawm Rs.87 crore chuang a ni a. Hetah hian state sorkar in a tum ve zat tur chu 10% a ni.

AMRUT hian a thil tum ber chu khawpui in tinin tui connection an neih bakah hnawmhnawk leh tui thli paihna mumal ‘sewage system’ nen an inthlunzawmna vek theih nana hmalak te; khawpui hlutna ti sang tu a ngaih, mumal taka enkawl park leh thing leh mau awmna hmun (green space) siam a enkawl bakah; khu leh bal (pollution) a lo tlakhniam theih nana public transport hman uar zawk te, ke a kal te tana hman tur pavement leh a dangte siam a huam a ni.

Vawiin vek khan UD&PA Minister ho hian a pisaah Multi Level Car Parking cum Multi Utility Centre, Zodin a sakna tura Standing Counsel din chuan an hmalakna kal mek sawiin an thukhawm a. He hunah hian Parliamentary Secretary Pu Hmingdailova Khiangte, Aizawl DC Pu Kannan Gopinathan, IAS leh UD&PA Department hotute an tel a ni.