1080/2026-2027

Aizawl, 19 june 2026: Health & Family Welfare Department Minister Pi Lalrinpuii chuan vawiin khan SAD Conference Hall No.1, MINECO, Aizawl-ah Directorate of Health Services (DHS) leh National Health Mission (NHM) hnuaia District Office hrang hrangte hnathawh dan thlirhona a neihpui. Meeting-ah hian District Chief Medical Officer (CMO), Sr.CMO zawng zawngte leh department official pawimawhte an tel a, district-te hmalakna, hlawhtlinna leh harsatna te an sawiho a ni.

Health Minister chuan thusawiin, Mizoram chhunga health indicator hrang hrangte hmasawnna chu District hrang hranga Senior CMO, CMO, Doctor, Nurse leh Health Worker-te thawhrimna leh inpekna vang a nih thu a sawi a. District tinah monitoring leh supervision tih chak a, district level review meeting regular taka nei thin tur leh programme data uluk taka thlir chunga hma la zel turin a chah. Deputy Commissioner-te nen thawhhona ṭha neih a pawimawh thu sawiin, district administration-ah regular staff leh NHM contractual staff-te inkara thawhhona tha siam tur leh field-a thawktute harsatna ngaihsak turin a fuih bawk a ni.

Minister chuan Maternal Death leh Infant Death thlengte chu uluk taka bawhzui a, programme hrang hrang hmalaknaah, nu leh nausen thi chungchangah uluk taka chhui a, thihna titlem lehzual tura hmalak chhunzawm zel tur a ni, a ti a. TB programme chu elimination phase-a a luh tawh avangin screening leh treatment-ah tan lak thar leh a ngai a, NQAS certification hna thawk zel tur leh thawktute fuih thar zel turin a chah bawk.

Meeting ah hian minister chuan CSR kaltlanga mamawh hrang hrang ngaihtuah leh online review meeting neih tam a pawimawh thu a sawi a; Cess sum hmangin hard area-a thawk Medical Officer-te tan motor lei tum a nih thu a tarlang. Achievement tam takte hi thingtlang lama kan field worker-te thawhrah anih avangin, District Office-a thawktute chu field worker-te harsatna thlen ngamna nih an tum tur a ni, a ti.

Meeting-ah hian hmasawnna chhuanawm tak tak te tarlan a ni a, chungte chu:

1) Nu leh nau hriselna: District tam zawkah damdawiina nau neih (institutional delivery) 95% chunglam a ni a. Hnahthial district-ah kum khat chhungin maternal death an nei lo a , Khawzawl district-in FY 2025–26 chhungin nu thi, nausen leh piang hlim thi an nei lo bawk.

2) Immunisation leh HPV: District tam takin 95–100% full immunisation an nei a, Khawzawl chuan Mizoramah a hmasa ber ni-in HPV vaccination 100% a ti tawh a ni.

3) NQAS Certification: Health facility tam takin National leh State NQAS certification an dawng a, Aizawl East-in an District Hospital, PHC leh UPHC-ah 100% certification an nei.

4) TB leh Malaria dona: Lunglei-in TB-free village 30 a puan bakah, Malaria case 50% in a ti tlahniam a, Malaria-free village 42 a nei bawk.

5) Infrastructure: Khawzawl district-in thla thum chhungin administrative health system an din fel a, Health & Wellness Centre zawng zawng solar an vuah bawk. Lunglei-in damlo phurhna Bolero Camper pahnih a dawng a ni.

Programme hi Pi Lalnunmawii Additional Secretary,Health & Family Welfare Department-in a kaihruai a, District tin Sr.CMO leh CMO te chuan presentation neiin an hnathawh tawh leh an hmachhawp te, an harsatnate thlenin hun an hmang a ni.