1425/2026-2027

Aizawl, 16 July 2026: Vawiin khan Khatla North Presbyterian Kohhran Hall-ah Mizo Hmeichhe Ṭangrual (MHT) chuan an pawl din champha, Kum 80 (Oak Jubilee) tlin lawmna inkhawm an hmang a. Lawmna hun hi Health & Family Welfare leh Social Welfare Department Minister Pi Lalrinpuii chuan khuallian niin a hmanpui.

Khuallian Pi Lalrinpuii chuan Mizo Hmeichhe Ṭangrual (MHT) in kum 80 an tling ta chu lawmpuina chibai a buk a. Hmanlai kan society hnufum tak, hmeichhiaten rorelna leh thutlukna siam kawnga chanvo an neih tlem laia hetiang pawl ropui tak a lo ding thei leh hruaitu hmasate inpekna chu ropui a tih thu a sawi a. Ram buai leh hun harsa lai (1968 chho) pawha Motherless Babies' Home hial an lo din thei te chu fakawm a tih thu a sawi bawk.

Minister chuan kum 2023 MLA inthlanpuiah hmeichhia pathum lai thlan tlin an nih thu leh Cabinet Minister meuh pawh an awm ve theih tak thu sawiin, Mizo hmeichhiaten hma kan sawn zel chu lawmawm a tih thu a sawi a. "A chak apiang leh a fing apiang hi an dingchhuak lo a, an hun tawna danglamna thleng mil zela inher rem thiam apiang an dingchhuak thin" tiin Mizo hmeichhiate chu hun danglam zel mila inher rem thiam turin a chah a. Ruihhlo, HIV/AIDS, cancer leh nupa inthenna hluar te chu Mizo society-in a hmachhawn mek an nih avangin, heng laka kan ram vawnghim tur hian hmeichhiaten mawhphurhna sang tak an neih thu a sawi bawk.

MHT Chanchin leh Hmalaknate: Inkhawmah hian MHT Secretary Pi Maria Lalchhanhimi hnen atangin report ngaihthlak a ni a. MHT hi July 16, 1946 a din niin, "Mizo Hmeichhia leh Naupangte Chawisan" chu an motto a ni. An hmalakna langsar zualte:

• Motherless Babies' Home: Kum 1968 khan din tan a ni a, tun thlengin naupang 418 lai enkawl tawh an ni.
• Working Women's Hostel: Aizawl khawpuia hnathawk leh lehkha zir, hmeichhe chanhai zawkte tan kum 1980 khan hawn a ni a. Mi 1700 bawr velin an lo chhawr tawh a ni.
• Puanthui Zirna: Hmeichhiaten mahni intodelh nan leh eizawnna an neih theih nan 2016 atang khan hawn a ni.
• Hmalakna dangte: Hmanlaiin Maternity and Child Welfare Clinic (1956-1973) leh Loin Loom Centre (1962-1967) te an lo kalpui tawh thin bakah, 1968-a Chanmari atanga Kulikawn inkar alkatra a luan turin Prime Minister Pu Jawaharlal Nehru an lo ngen hlawhtling tawh bawk.

MHT Hmathlir (Vision): MHT hian hmathlir lian tak neiin, Aizawl khawpui laili takah LSC thlap neiin building puitling tha tak, motor parking chhawng hnih awmna tur sak thar an tum mek a. Heta tang hian Mizo handicraft emporium, restaurant, Conference/Meeting Hall leh Day Care cum Recreation centre te hawngin Mizo mipuite rawngbawlsak an tum a ni. He project atana sum mamawh zat hi cheng nuai 949 (949 lakhs) vel tura chhut a ni.

He lawmna inkhawm hi MHT President Pi C. Dailovi’n a kaihruai a, MHT Vice President Pi Chhawnkimi’n lawmthu sawinain hun a khar a ni.