1424/2026-2027

Champhai, 16th July 2026:  Vawiin khan Mizoram District Transformation Programme hnuaia Champhai District hmalakna pakhatna Project Sunsilk hawnna hun chu Circuit House Conference Hall, Champhaiah neih a ni a. He hun hi Champhai Bawrhsap Pu Mohammad Aaquib chuan khuallian niin a hmanpui a ni.

Project Sunsilk hi Mizoram sawrkar flagship Programme Bana kaih hnuaia peng pawimawh tak - Mizoram District Transformation Programme hnuaia Champhai District hmalakna pakhat a ni a. He hmalakna hnuaiah hian Sericulture Department hnuaia khaw panga - Ngur, Hmunhmeltha, Dilkawn, Khawbung leh Zokhawthara pangang khawitu ten an buhchium dah thatna tur Deep Freezer panga pek chhuah a ni a; Ngur khuaa Ngausih Zaua pangang khawitu te harsatna sukiang turin ni zung chakna (solar) hmun thumah bun sak an ni bawk. 

Khuallian Pu Mohammad Aaquib chuan he hunah hian thu sawiin Mizoram District Transformation Programme kaltlanga Champhai District hnuaia Sericulture pangang khawitute mamawh pek chhuah theih a ni ta chu lawmawm a tih thu sawiin, Mizoram sawrkar leh Project Sunsilk hlawhtlinna tura tha thawh tu zawng zawng te chungah lawmthu a sawi a. Kuthnathawktute harsatna su kiang tur leh anmahni tanpui turin theihtawp chhuah zel an tum thu a sawi bawk a ni.

He hun hi Champhai District Sericulture Officer Pi K. Lallawmzuali chuan a kaihruai a. Pu Lalchhuanawma Ralte, SDC chuan project report a pe a. Pu Malsawmsanga, Ngur leh Pu Lalmuankima, Dilkawn Eri Rearer Association te pawhin thu sawiin, Dr Peter Malsawmtluanga, SDO (S) chuan lawmthu sawiin hun a khar a ni