1423/2026-2027

Aizawl, 16 July 2026: Vawiin khan Aizawla MINECO Secretariat Conference Hall–II-ah Study Committee on KMMTTP (Kaladan Multi Modal Transit Transport Project) and Railway line between Bairabi and Sairang chu an Chairman, Pu T. Lalhlimpuia MLA hovin an ṭhu khawm a. Hemi Committee-ah hian Department hrang hrang Secretary-te telin, sawm a nih angin Mizoram Youth Commission Chairman Pu Malsawmzuala Ralte chuan a telpui bawk.

He ṭhut khawmah hian Study Committee hma lak tawhna hrang hrangte report pek a ni a. KMMTTP zir chianna neih meka West Bengal tlawh aṭanga thil hmuh leh Mizoram tana hma lak theihna awmte report-ah hian ngaithlak a ni.

SIRD-in Bairabi leh Sairang inkar rel kawngina mipui a nghawng dan, Social Impact Assessment an neih zawh tak report ngaihthlak niin, Sairang leh Bairabi inkar hmasawnna tur chhawp chhuahte PowerPoint presentation thlir ho a ni bawk.

MYC Chairman Pu Malsawmzuala Ralte pawhin report pein, KMMTTP leh Bairabi leh Sairang inkar rel kawng kalin ṭhalaite tana eizawnna remchang a chhawp chhuah turte leh MYC anga hma an lakna te a sawi.

Study Committee chuan sawrkar laipuiin Act East Policy aṭanga KMMTTP a kalpui tur leh Railway kaihhnawiha Mizoramin mamawh a neih hrang hrangte phuhrukna tura department hrang hrang aṭanga rawtna awmte an sawi ho bawk.

Study Committee hian an thil zir hi Draft Report an peih tawh a. Thlir ho hnuah Mizoram Chief Minister hnena theh luh phawt ni se, tiin an rel.