1422/2026-2027

Lunglei, 2026 Vawkhniahzawn thla ni 16: Vawiin khan Women & Child Development (WCD) Department leh Post Office, Lunglei District te ṭang kawp huaihawtin WCD Conference Hall, Lungleiah hmeichhe naupangte an puitlin hun atana nu leh pate'n sum an khawlsakna tur hma lakna, "Project Thaichhawninu" hawnna hun buatsaih a ni.

Lunglei Child Development Project Officer (CDPO) Pi R. Lalhmingliani chuan hun kaihruaiin, MDC Supervisor Pu Lalchhanhima chuan Sukanya Samriddhi Yojana (SSY) hnuaia hmeichhe naupang tana sum khawlsakna tur Sukanya Samriddhi Account (SSA) hawn theih dan leh SSA kalphung a sawi fiah a. Lunglei MDG-a Post Master Pu C. Lalhmangaihzuala chuan Project Thaichhawninu chu Lunglei District chhunga hmeichhe naupang account hawng thei chin nei nu leh pate'n an lo hriat a, an fate tan an lo hman ṭangkai a duh thu sawiin, Lunglei District chhunga Post Office zawng zawngah hma lak chhoh an tum dan a sawi a. Vawiin aṭangin Lunglei khaw chhunga Anganwadi Centre (AWC) zawng zawng tlawh chhuah an tum thu leh vawiinah AWC pahnih Venglai AWC-I leh AWC-II-ahte DHEW staff leh Post Office staff te'n inzirtirna an kalpui ṭan nghal thu sawiin, Anganwadi Worker-te chu theih tawp chhuaha thawh hopui atan a sawm.

Lunglei District Programme Officer (WCD) Pu R. Lalnunpuia chuan SSY chu WCD leh Post Office Mizoram te'n "Project Thaichhawninu" tia an kalpui dan sawiin, Anganwadi Worker-te chu an naupangte tana nu leh pate'n SSY account hawnsak tura lo fuih turin a chah a. Lawm thu sawiin hun a khar.

"Project Thaichhawninu" hian a tum ber chu kum 10 hnuai lam fanu nei chhungkaw tam thei ang berin Sukanya Samriddhi Account (SSA) an hawn a, an fanute tana sum an khawlsak theih nana hma lak niin, Mizoram pumah account thar 4,050 hawn belha hma lak tum a ni a. Hei hi WCD hnuaia Beti Bachao Beti Padhao (BBBP) scheme pakhat tihhlawhtlinna niin, hmeichhe naupangte'n kum 10 an tlin hmaa nu leh pate an tana account an hawnsak a, an puitlin hun atana a pung ṭha leh him zawka sum an khawlsak theihna tur ruahmanna a ni.