519/2026-2027

Dated Aizawl: the 14th May 2026: Vawiin khan Health & Family Welfare Minister Pi Lalrinpuii chuan Vanapa Hall-ah, Mizoram Board of School Education-in kumin 2026 Higher Secondary School Leaving Certificate (HSSLC) result a tihchhuah tak a Science, Arts leh Commerce stream-a Mizo zirlai tithate chawimawina hun MSU leh Mizoram Cooperative Apex Banks Pvt. ltd. buatsaih chu khuallian niin a hmanpui a. MCAB Chairman Pu Lalnunsanga Rokhum chu khualzahawm a ni.

Khuallian Minister Pi Lalrinpuii chuan thusawiin, Zirlai tithate hlawhtlinna chu kum tluana an thawhrim rah a nih thu sawiin, thil tha tih reng reng a thlawn ngailo a ti a. Mizoramin Result tha tak tak a neih thin chu lawmawm tiin, Toppers-te leh zirlai kalkhawmte chu inthlahdah mai lo tura fuihin, sang tak an thlen tawhna chu a aia sang zawk thlen tum turin a chah a ni. Minister chuan hlawhtlinna kawng zawh tura pawimawh tak tak Discipline leh Time Management chu mahni nunah theuh seng lut turin kalkhawmte chu a chah a. Zirlaite chu bul an tan chauh a ni tih inhriain, huaisenna leh taimakna nen bei chhunzawm zel tura chahin, “ Tumkhat hlawhtlin hi a tawk mai lo a, vawikhat hlawhchham pawh a in siamthat theih, a pawimawh ber zawk erawh chu bei chhunzawm zel tura huaisenna neih”, a nih thu a sawi bawk. Minister chuan Mizo-te All India Service leh Central Service-ah te inziak tling kan awm tlem ta chu a ngaimawh thu sawiin, kalkhawmte chu Mizoram chhung mai nilo, India ram inelna sang zawk UPSC-ah te leh NEET-ah te inziak tling thei tura tan la sauh sauh turin a fuih bawk a ni. Zirna kan ngaih pawimawh tluk zet hian hriselna kan dahsan a pawimawh thu sawi bawkin, zirlaite leh kalkhawmte chu natna ruihhlo leh a kaihhnawih mipat hmeichhiatna thianghlimlo te lakah fihlim tur leh, nun invawng tak nei turin a fuih bawk a ni.

Khualzahawm Pu Lalnunsanga Rokhum pawhin thu sawiin, zirlaite chu ram leh hnam tana chhenfakawm tak nih tum theuh turin a chah a,zirna mai bakah entrepreneurship-ah te an rilru seng turin a fuih bawk a ni. Zirlaite chu Zoram hmasawnna rahbi an nih thu sawin, ram hmel timawitu ni thei turin hmalam pan zel turin a chah a, an kal zelna turah duhsakna a hlan nghal bawk. MSU President, Pu B. Lalkhawngaihzuala pawhin fuihna thu sawiin, zirlaite chu chawimawina dawng pha ve lo an nih pawhin beidawng mai loin, khawvel intlansiakna chu a intan chauh a ni tih hriain, bei zel turin a chah bawk a ni.

He hunah hian zirlaite tana pawimawh tak career guidance chungchang inzirtirna neih niin, Resource person Dr. Lalhruaitluanga , Zo-Career founder chuan hun a hmang a ni.

Ziralai titha chawimawina hlante chu:

1.Science stream:
1st Rank – Lalmoipuia Lawmzual, St. Pauls HSS
2nd Rank - K.Zomuanpuia, BHSS Lunglei
2nd Rank - LH Lalrammuanpuii, St. Joseph HSS
3rd Rank - Zothanhlira, St. Pauls HSS

2. Commerce stream:
1st Rank - Vanlaltleipuia Chhangte, St. Pauls HSS
2nd Rank - Rothangpuia, St. Joseph HSS
4th Rank - Lydia Sui Nei, Oikos HSS

3. Art stream:
1st Rank – Lalnunhlui Sailo, St. Pauls HSS
2nd Rank - Willis Chawngthanseia, St. Pauls HSS
3rd Rank - Vanlalngaihzuali Sailo, Helen Lowry HSS

Vawiina hun hmannaah hian MSU hruaitute leh Zirlai tithate school an tel a. Hun hi  Pu Lalrampanmawia, Treasurer, MSU-in kaihruaiin, Pu Lalruatpuia, General Secretary, MSU chuan  MSU hmalakna hrang hrangte report a pe a. He hunah hian khuallian, khualzahawm leh MSU president-tein Zirlai tithate hi chawimawina an hlan a ni.