State Agricultural Management & Extension Training Institute (SAMETI), Mizoram leh Sericulture Department te tangkawpin an buatsaih “Skill Development Training on Sericulturist” chu Sericulture Training Institute, Zemabawk-ah ni 26 February  hian Pi Vanlalawmpuii Chawngthu, Minister of State, Sericulture Department chuan a hawng.

Pi Vanlalawmpuii Chawngthu chuan SAMETI-in hetiang Skill Development training pawimawh tak silk pangang khawi tute tana an buatsaih thei hi lawmawm atih thu sawiin pangang khawia eizawngte tan hian a hralh chhuahna lamah harsatna a awm lova, kan mamawh tawk hi kan la thar chhuak zo lova, chuvangin he Skill training hmang tangkaia midangte zirtir chhawng leh thei tur khawp a zir chhuak turin a chah a, a chhawrtu turte chu keimahni bawk kan nih avangin thahnemngaitak chunga zir turin a fuih bawk.

He training hawnna hun hi SAMETI Director Pu R.K.Nithanga’n kaihruaiin, Agriculture Skill Council of India in SAMETI hi Sericulturist leh Tractor Operator te train tura an rawn thlan thu tarlangin, thalaite kuthnathawh kan in zirtir uar a hun tawh thu a sawi bawk. He training hi kar 2 awh tur a ni a, Sericulture mithiamten practical nen an zirtir dawn a ni.