Vawiin khan Mizoram Cooperative Apex Bank (MCAB) Chairman Pi T. Lalmuanpuii leh LADC CEM Pu T. Zakunga te chuan CEM office chamber-ah LADC huam chhunga MCAB hma lak theihna tur hrang hrang an sawi dun a. He hunah hian LADC Executive Secretary Pu H. Lalramenga, official dang leh chanchinbu mite pawh an tel.

Pi T. Lalmuanpuii chuan Apex Bank hna thawh dan leh hma lakna tlangpui a sawi fiah a. Ram hma sawn nan inpuibawm tawn tura thawh hona (cooperative movement) chu hmanraw tha ber nia a hriat thu sawiin, thingtlang khaw tinah mahni thawh chhuah ngei hmanga khawtlang tanrualna leh hmasawnna atan hman theih a nih thu a sawi a. MCAB Lawngtlai Branch chu thawktu dah belh leh chak zawka loan pe chhuak thei tura tihchangtlun an tum thu a sawi.

He hunah hian LADC huam chhunga bank awm lohna thingtlang khaw tam takin harsatna an tawh thin leh sawrkar hma laknaah pawh harsatna awm thinte sawi ho a ni a. LADC hotute chuan MCAB lamin mipuite harsatna sut kian nan branch hawn leh PACS din dan te ngaihtuahpui se an duh thu an sawi a. Lawngtlai leh LADC complex-a ATM dah theih dan tur leh loan pek dan chungchang te pawh sawi ho a ni.

Mizoram Cooperative Apex Bank hian bank la awm lohna hmunahte bank ang chiaha sum khawlna, deposit leh lak chhuah, loan lak te nena tih vek theihna Primary Agriculture Credit Cooperative Society (PACS) din a nih theihna hma an la thin a. Tunah hian Mizoram hmun hrang hrangah PACS hi 26 din tawh a ni a. MLA bial tina din thei tura hma lak chhoh mek a ni bawk.