Vawiin chawhma dar 11 khan DC’s Conference Hall, Keifangtlangah Chapchar Kut lawm dan tur  thlirhona meeting Champhai District Bawrhsap charge la mektu Pi Lalsangpuii Hmar, Addl DC, Chairman, Chapchar Kut Celebration Committee hova neih a ni.

Pi Lalsangpuii Hmar in kalkhawmte lawmna thu leh meeting neih anih chhan a sawi a. Pu PC Lalrawnliana, Member Secretary, District Chapchar Kut Celebration Committee hnen atangin meeting hmasa minute leh programme duan chin tlangpuite ngaihthlakna neih a ni. 

Meeting-ah hian kumin March ni 2 a hman tur Chapchar Kut atana inpuahchahna leh programme duan lawkte thlirhona neih niin programme-a siamthat ngaite siam that anih hnuin pawm a ni a. He hunah hian hlawhtlinhg taka Kut hman anih theih nana sawrkar department hrang hrangte chanvo leh hlenchhuah turte pawh ruat fel nghal a ni.

Champhaia Chapchar Kut hmanna tur senso Mizoram sawrkarin rawn tipungin cheng nuai 2 ruahman anih thu meeting chuan a tarlang a, hemi anih a vang hian Vehbur khawn tura lo rel tawh chu  khawn loh mai nise tih a ni a. Chapchar Kutah hian Mizo zia lang tam thei ang ber a inchei turin Chapchar Kut Celebration Committee chuan mipuite a ngen a. Naupang Kum 6 hnuai lam tan Mizo incheina a incheinalh Mipa leh Hmeichhiaah lawmman pakhatna atanga pathumna thleng siam a ni dawn a. Tin, Chapchar Kut Miss-2018 pawh he hunah hian thlan  a ni bawk dawn a ni.

Chapchar Kut 2018 hi March ni 2, 2018 hian Kahrawt Field, Champhaiah chawhma dar 10:30 atanga lawmna neih a ni dawn a. He hunah hian Kut Pa atan Pu H.Lianruma leh Kut thlengtu tur atan Pi Lalsangpuii Hmar, Addl DC-te chu beisei an ni.

Kutah hian mizo hnam lam chi hrang hrang thlirho theih tura beisei a ni a. Heng bakah hian zaipawl leh malzai mawi tak tak ngaihthlak theih tura ruahman a ni. Chapchar Kut hlawhtlin zawk nan sawrkar hnathawk leh mipuite chu a tam thei ang ber Kut chhim turin Chapchar Kut Celebration Committee chuan a sawm a. Meeting chuan February ni 26 atanga March ni 1 thleng sawrkar hnathawk leh zirlaite chu an hnathawhna hmun leh zirna Inah a tam thei ang bera mizo silhfen inbel tura ngenin a hriattir nawn leh bawk a ni. 

Meeting-ah hian sawrkar official-te, NGO hrang hrang hruaitute, khawtlang hruaitute leh Chanchinbumite an tel a ni.

 

Attachment

  • Loading attachment...