3009/2024-2025

Aizawl, the 14th November, 2024: Rural Development, Public Health Engineering leh Horticulture Department changtu Minister Prof. Lalnilawma chuan vawiin chawhnu dar 2:00 khan Blessino Nursing School Maubawk, Aizawl tena '6th Batch Capping & Lamp Lighting leh 3rd Batch Graduation' puala hun an hman chu Khuallian ni a telpuiin pass tharte certificate a hlan a, Dr. S.R Ngurchamliana, Addl. Director, DHME, H&FW Department chu he hunah hian Khualzahawm a ni.

Khuallian Prof. Lalnilawma chuan Blessino Nursing School-in hun chhinchhiah tlak leh mellung pawimawh tak 'Capping, Lamp Lighting & Graduation Ceremony' an hmang chu a lawmpui takzet thu sawiin, Nurse zir thar, zir mek leh zir chhuak hlimte chu midang tana rawngbawltu an ni tih inhriaa inpekna leh hmangaihna nena mawhphurhnate tha taka hlen chhuah tum turin a fuih a. Nurse-te entawn leh khawvel pum ngaihsan rawn Modern Nursing Founder Florence Nightingale inpekna leh rawngbawlnate hre renga, hmangaihna leh khawngaihna nunpui tlat turin a chah a. Nursing profession duha lutte chu eizawnna a nih rualin mahni tan chauh ni tawh lova, midang tana nun pek tum turin a chah bawk.

Rural Development Minister chuan Nurse-te chu health sector-a mi pawimawh berte zinga mi an nih thu sawiin, dawhtheihna neia, midang dinhmun hriatthiam pui tur leh rilru zau tak pu turin a fuih a. Hnual chang leh hrehawm tih changte pawh an neih hun a la awm dawn thu sawiin, harsatnate chu inhneh tir mai lova chak nana hman tum zawk turin Nurse zirlaite a fuih a. Anmahni pana dawrtute hmangaih taka lo dawngsawng thin tura chahin, "Tawngkam tha hi damdawi pawimawh tak a ni," a ti a. Nurse zir tharte eizawnna zahawm takah a lawmluh rualin, graduate tharte pawh an kalzelna turah hlawhtlinna chang turin duhsakna a hlan nghal a ni.

He hun hi Pi Lalneihmawii Sailo, Tutor chuan kaihruaiin Synod Campus Ministry Director Rev. H. L. Thianghlima'n hunserh a hmang a. Blessino Nursing School Principal Pi C.Lalsawmliani hnen atangin report ngaihthlak a nih hnuah Civil Hospital Aizawl Nursing Superintendent Pi Lalrinthangi Pachuau chuan zirlai tharte lukhum a khumtir (capping) bakah khawnvar chhitna (lamp lighting) leh thutiam sawirualna hun a kaihruai a. Khualzahawm Dr. S.R Ngurchamliana, Addl. Director, DHME leh Dr. Lalrinawma Hnamte, Managing Director, Aizawl Hospital and Research Centre te'n fuihna thu an sawi a. Pastor Larintluanga Tlau, Aizawl South Circle Leader-in inhlanna hun hmangin Upa F. Vanlalchhuanga'n malsawm tawngtaina hun a hmang a, zirlai leh nu leh pate hnen atangin thusawi ngaihthlak a ni bawk. Dr. C. Vanneihthanga, Managing Director, BNS in lawmthu sawiin hun hman a khar a ni.

Vawiina Blessino Nursing School Maubawka ,6th Batch Capping & Lamp Lighting leh 3rd Batch Graduation hun buatsaihah hian zir chhuak mi 24 te thlahna leh lut thar 30 te lawmna hun hman a ni.

Nurse zirlaite lukhum inkhumtir (capping) hian inpekna, thuawihna leh tumruhna a entir a, khawnvar chhit (lamp lighting) hi Founder of Modern Nursing Florence Nightingale hriatreng nana buatsaih niin damlo leh mangangte tana meieng, damna leh beiseina thar a entir bakah hmasawnna leh thiamna sang zawk nei zel tura tanlaknate, malsawmna leh midangte tana rawngbawl tura inpekna leh intiamnate a entir a ni.

Blessino Nursing School, Maubawk hi kum 2019 a din niin Mizoram Nursing Council (MNC) leh Indian Nursing Council (INC) pawmpui a ni a. Kum tin zirlai 30 lak thar thin niin, GNM zir chhuak 83 an nei tawh a ni. Tun dinhmunah zirlai 88 leh thawktu 24 (zirtirtu 9 leh staff dang 15) an awm mek a. Parent Hospital hi Aizawl Hospital and Research Centre niin, Affiliated Hospital atan Civil Hospital Aizawl, Zoram Medical College, Kulikawn Hospital, Mizoram Cancer Institute, Aizawl Adventist Hospital leh Greenwood Hospital-te an nei a ni.