2321/2025-2026

Saitual, the 20th November, 2025: Vawiin khan Minister of State, Ṭawi bialtu MLA ni bawk, Prof. Lalnilawma chu khuallian niin Lenchim khua Golden Jubilee (1975-2025) lawmna hun a hmanpui a, Golden Jubilee Lungphun hawngin, Golden Jubilee Souvenir a tlangzarh nghal a ni.

He hunah hian khuallian Prof. Lalnilawma chuan Lenchim khaw mipuite chu Golden Jubilee chibai a buk a, Lenchim chu rambuai laiin Tlungvel lamah sawikhawm niin, kum 1975 khan din thar leh a ni tih a sawi a, kum 50-na hmel an hmu thei chu lawmawm a tih thu a sawi bawk.

Minister chuan Lenchim khua chu khaw lian lo tak, a cheng mihring pawh tlem te ni mah se, kawng tam takah khaw dang aiin an lian zawk thei a ni, a ti a, Lenchim khaw mipuite chu zirna leh faina kawngah te, infiamna lamah te leh intodelhna kawngah te tan la zual sauh turin a fuih nghal ni. Khuallian chuan Lenchim khua chuan hming a chher theih nan mipuite chu an ngaihtuahna seng turin a fuih a, ruahmanna tha tak an neih phawt chuan sawrkar lam atang pawha puih an inhuam reng thu a sawi bawk.

Prof. Lalnilawma chuan Saitual District-a kuthnathawktute nena an hma lakhona hrang hrang te a tarlang a, Lenchim khua pawh hmasawnna tur ngaihtuah a, mahni intodelh tum a, theih tawp chhuah zel turin a chah a, Golden Jubilee lawmna chu hlim leh nuam taka hmang turin a duhsakna a hlan bawk a ni.

Lenchim khua Golden Jubilee (1975-2025) lawmna leh haw runpui hi November ni 19 atanga ni 21 thleng hman tur a ni a, vawiin khan Golden Jubilee lungphun hawnna leh lawmna vantlang inkhawm neih niin, November ni 21, 2025 hian inthlahna leh Jubilee kharna hun hman a ni ang.

Vawiin inkhawm hi Pu C. Lalremtluanga, Chairman, Golden Jubilee Committee chuan a kai hruai a, hunserh hi Upa K. Sangthanga, PCI-in hmangin, khuallian Minister Prof. Lalnilawma, Major K. Biakthuama, Chairman, Lenchim Welfare leh Pu C. Lalzamliana ten thu an sawi a ni.

Lenchim khua hi Saitual atanga chhim lam Ṭawi tlang bulthuta awm a ni a, Aizawl atangin km 87-a hla niin, Saitual atang erawh chuan km 16 chauha hla a ni. Tunah hian Phullen RD Block hnuaiah a awm mek a ni.