2322/2025-2026

Saipum, 20th November, 2025 : Vawiin chawhnu khan Land Resources, Soil & Water Conservation Department Minister Pu Lalthansanga chuan Saipum-ah kuthnathawktute hmunphiah thar dahkhawmna tur 'Broom Warehouse cum Collection Centre, Site Office & Dry Yard' a hawng a. He hunah hian Lunglei, Mamit leh Kolasib district-a warehouse 6 sak zinga a dang panga te chu Saipum atang hian a rualin a hawng nghal a ni. He hun hi  Pu Lalfamkima,Deputy Speaker, Mizoram Legislative Assembly chuan Khualzahawm niin a hmanpui bawk.

Khuallian, Minister Pu Lalthansanga , Land Resources,Soil and water conservation Department chuan thu sawiin, Saipum khuain hun rei tak ata an lo mamawh em em, hmunphiah dahkhawmna hmun (Warehouse) tha tak an hawng thei chu lawmawm a tih thu a sawi a. ZPM-in sawrkarna an siam  kum hnih chhung lekin hmasawnna tam tak a lang thei a ni, a ti. Warehouse hawn tak chu mipuite ta a nih avangin neitu chan chang a, vawng him a, thianghlim taka lo enkawl zui turin mipuite a chah nghal bawk.

Minister chuan sawrkar chuan kuthnathawktute hmasawnna turin dodalna karah pawh hna chak takin a kalpui zel tih a sawi a. Chief Minister Rubber Mission kalpui tan a nih thu te, hmunphiah godown te sak a nih bakah, kuhva (arecanut) a hnah leh a kawr thlenga hman tangkai theih dan tur  ngaihtuahin hma lak mek a ni, a ti. Sawrkar chu kuthnathawktute tan a ding tlat a, tanpui turin a inhuam reng a ni tiin; Chief Minister Special Package leh beneficiary hrang hrang thlanna kawngah pawh, a dawng tur dik tak ten an dawn theih nan hleih nei lovin langtlang takin sawrkarin hma a la a ni, a ti bawk. Sawrkar hmalakna hrang hrang - GPF pek chhuah chungchang te, tun hnaia DA tihpun te leh kuthnathawktute chawikanna kawnga hmasawnna hrang hrang a tarlang bawk.

He hunah hian Khualzahawm, Pu Lalfamkima, Deputy speaker, Mizoram Legislative Assembly pawhin thu sawiin, Saipum khuain Broom Warehouse tha tak mai an nei chu lawmawm a tih thu a sawi a. Hlawhtling tur chuan taimakna a pawimawh thu sawiin, hmunphiah dah that tur pawh thawkchhuak tura theihtawpa tan la turin kalkhawmte a chah a. Hmun hrang hrangah Godown tha pui pui hman lohva awm a awm leh thin chu pawi a tih thu sawiin, an Godown neih thar chu a nihna tur ang taka an hman tangkai ngei a beisei a ni, a ti.

Warehouse hawnna inkhawm hi Pu V Ruatsanga, Secretary, Land Resources, Soil & Water Conservation Department chuan a kaihruai a.  Er. Vanlalmuanpuia Chhangte, Director, Land Resources, Soil & Water Conservation Department chuan technical report pe in, Warehouse  hi Lunglei District-ah Tiperaghat leh Marpara South; Kolasib District-ah Saipum leh Vairengte; Mamit District-ah Pukzing leh Marpara-ah te sak a ni ni, a ti. Heng Warehouse 6 sak nan hian NABARD RIDF hnuai atangin Rs. Nuai 800 leh sangriat hmuh niin, tha taka sak zawh vek a nih thu a tarlang. Saipum Warehouse bik hi hmun 5 danga sak te aiin a lian zawk a, quintal 10,500 vel dawng thei tura ngaih niin; Warehouse, site office leh a behbawm zawng zawng nen Rs. Nuai 162 leh sangriat hman a ni, a ti. Heng project te hi hmunphiah thar chhuah dahkhawmna mamawhna a san avanga duan a ni a ti bawk.

He hunah hian Kolasib a Head of Offices thenkhatte leh Saipum leh a chhehvel khua atangin mipui thahnem tak an kalkhawm a ni.