4888/2024-2025 

Saitual, the 28th March, 2025: Vawiin chawhnu khan Saitual District Hospital-in Kayakalp Award 2024-2025-a pakhatna an dawn leh Eco Friendly Facility Award pahnihna an dawn lawmna chu Keifang YMA Zawlbuk-ah hman a ni a, Minister of State, Ṭawi bialtu MLA ni bawk, Prof. Lalnilawma chu khuallian niin he hun hi a hmanpui a, Pu Lallawmawma, Addl DC, Saitual chu khual zahawm niin a telpui bawk a ni. 

He hunah hian khuallian Prof. Lalnilawma chuan thu a sawi a, Kayakalp award-a pakhatna leh Eco Friendly Facility-a pahnihna lawmman Saitual District Hospital-in a la thei chu a ropuiin a lawmawm hle a ni, a ti. Khuallian chuan Saitual District-ah hmasawnna hmel hrang hrang hmuh tur a awm chu lawmawm a tih thu a sawi a, tun hnai maiah Tourism itinerary creation competition-ah pahnihna lain, District fai ber lawmman pakhatna leh District Hospital fai ber lawmman pakhatna la thei dinhmuna an ding leh zel chu district mipuite leh khawtlang hruaitute thawhhona tha tak rah a ni, a ti.   

Minister chuan hospital thuam chak nan theih tawp chhuah a inhuam thu a sawi a, Saitual district hospital-a Intensive Care Unit (ICU), Blood bank leh Multi Utility Vehicle hman tur a awm theih nan hma lak mek a ni tih a sawi bawk. 

 Prof. Lalnilawma chuan hriselna leh faina kawnga Saitual District-in hma an sawn zel theih nan damdawi ina hnathawktute, department hotute leh khawtlang hruaitute chu theih tawp chhuah a, hawihhawmna nen mi chhawn zel turin a chah a ni.   

Khual zahawm Pu Lallawmawma, Addl DC pawhin thu sawiin Kayakalp lawmman dawn chu thil awl ai tak a ni lo, a ti a, tehna hrang hrang hmanga teh hnua lawmman pakhatna Saitual District-in an dawng thei chu lawmawm a tih thu a sawi. Addl DC chuan damdawi in lama hotute leh a thawk te chu an thawhrimnaah fakawm a tih thu a sawi a, an hna thawhna kawngah theih tawp chhuah zel turin a chah bawk a ni. Faina kawnga hmasawn zel turin kalkhawmte chu Pu Lallawmawma chuan a sawm nghal a ni.

Vawiin Saitual District Hospital Kayakalp leh Eco Friendly lawmman dawn lawmnaah hian hunserh hi Rev. Thangchhuaka, PCI, Saitual Pastor Bialin a hmang a, khuallian Minister Prof. Lalnilawma leh khual zahawm Pu Lallawmawma Addl. DC te chuan thu an sawi. District Hospital report hi Dr. Zothanpari Chhakchhuak hnen atanga ngaihthlak niin, T. Vanlalliani, Sr. Nursing Officer chuan lawmthu sawinain hun a khar a ni.   

He hunah hian Dr. V. Lalremruata, Dy. CMO, Lt. Col. Clement Lalhmingthanga, Champhai South bialtu MLA te bakah District Hospitala thawk te, department hotute, kohhran hruaitute, NGO leh khawtlang hruaitute an tel a ni.