416/2025-2026

Khawzawl, dated 30th April 2025: Vawiin chawhma dar 10:30 khan Tualpui Centenary Hall-ah Rural Development (RD) leh Public Health Engineering (PHE) Minister Prof. Lalnilawma chuan Mizoram Hmeichhe Insuihkhawm Pawl (MHIP) Tualpui Branch Golden Jubilee lawmna hun khuallian niin a hmanpui.

Minister Prof. Nilawma hi Field zawlah Tualpui MHIP Branch chuan an lo lawm a, Minister hian lungphun hawnna hun a hmang. Dar 11:30-ah Centenary Hall-ah programme chhunzawm a ni.

Minister Prof. Nilawma chuan thu sawiin he huna lo tel zawng zawngte lawmin an hun hlu tak senga an tel theih avangin lawmthu a sawi a, MHIP hruaitute leh member te hun hlimawm tak buatsaihin thu tha leh ngaihnawm tak tak an sawi a, a hmuhnawmin a ngaihnawm hle a ni tih a sawi. Tualpui khuain Mizoram hmun hrang hrangah meichherna an nei a ni tiin a fak a, Mizoram pum tana entawn tlak an nih thu a sawi. MHIP chuan hmeichhe dinhmun chawikan mai bakah khawtlang nun siamthat hna rim takin an thawk a, hleilenna te, hursualna te, tihduhdahna te a tlem phah a ni tih a sawi. Khawtlang tana an tangkai ang hian chhungkaw tan tangkai zel turin kalkhawm te a fuih a, hun pawh thiam taka hmanga insiamrem thiam tur leh member te inchhawk tawn turin a fuih bawk. Tunlai khawvelah mipa tam tak ruihhlo leh thil sual tihbuaiin an awm tih a sawi a, hemi do tur hian MHIP te'n mahni chhungkua atanga tanin khawtlang thlengin inzirtirna leh inenkawlna tha nei zel turin a chah. MHIP hruaitute an kal zelna turah duhsakna a hlan a, a tul apiangah biak theih reng a ni tih a sawi bawk a ni.

He hun hi Tualpui MHIP Vice President Pi Ngurpianmawii'n a kaihruai a, Secretary Pi Lalhmunsangi'n in lawmna thusawi leh inhmelhriattirna hun hmangin report tawi a pe bawk. MHIP General Headquarters leh Sub Headquarters hruaitute'n thu an sawi bawk a, malzai Lalbiakhluni Colney hnen atangin ngaihthlak a ni bawk. MHIP member te'n zai te leh lemchan tein  intihhlimna hun tha tak an hmang bawk a ni.

He hunah hian Minister Prof. Lalnilawma hi PHE atangin Champhai SE Er. Lalthanzuali, Khawzawl EE Er. Liantluanga Chohte, SDO Er. Freddy Vanlalmuanawma, BDO Pu Timothy R. Lalhmangaiha te'n an tawiawm a ni.