1601/2026-2027

Dt.31st July 2026: Minister Prof.Lalnilawma chuan vawiin khan a pisaah AMC Corporator thlan tharte chu thingpui a inpui. Mipui tan AMC Corporator te nen theihtawp chhuah a, inhawng tak leh inpawh tak chunga hna kan thawh ho a tul a ni, Minister chuan a ti.

Minister chuan Urban hi AMC lam chan a nih thu te, kan tui dahkhawlna leh tui supply dan kawngah te leh mipui mamawhna hrang hrangah PHE Dept chuan theihtawp kan chhuah mek zel a, mahse sum hian kan mamawhna zawng zawngah min daih vek seng vek lova, hetah hian kan AMC lam, a bikin kan Corporator te nen kan bial ah teuh kan tan ho a ngai hle a ni, a ti. PHE Dept lam atangin theihtawp an chhuah zel dawn tih sawiin, AMC lam pawh theihtawpa an tan a tul thu te, thawhhona tha tak an neih chuan hna hi nasa takin an thawk thei dawn a ni, a ti.

DM&R changtu Minister Prof Lalnilawma chuan khuarel chhiatna Aizawl hmun hrang hranga thleng thin chungchangah nasa lehzuala inpawh zawka an thawhho zel a tul, a ti a. State Sawrkar lam chu an inhawng reng tih sawiin inpawh taka thawkho a, an theihna zawn ah theuh mipui tan theihtawp chhuahpui zel turin a sawm a ni. Leivung a hmun lova paih avang te, insak dan fimkhur tawk loh vang te, lei laihdan kawngah te leh bawlhhlawh paihdanah te tun aia nasaa tan kan lak a tul, tih sawiin, thuneitute lam pawh tun aia nasa a kan tan a tul hle a ni, a ti a. Fimkhur tawk lohna avanga khuarel chhiatna thleng thin te pumpelh tur hian sawrkar thuneitute leh mipui thelnga tangrual a, thawho that a tul hle a ni, a ti bawk.

Leivung paih chungchang sawi zawmin Prof Lalnilawma chuan leivung a paihna hmuna paih a nih loh avang hian Aizawl khawpui mipui ten tui thianghlim supply mumal tak an hmu lo fo, a ti a. Leivung a hmun lova paih avangin Tlawng lui leh lui dang a bawlhhlawh nasa thin hle a, fur lai phei chuan Aizawl khawpui chawmtu hi a nut nasat thin avangin PHE Dept hian harsatna kan tawk nasa thin hle a ni, a ti a. Leivung paih leh Bawlhlawh paih lamah hian khauh taka dan kenkawh a ngai hle a, AMC lam pawh theihtawp lo chhuah tura ngenin mipui te tana harsatna thlen loh theih dan ang berin, kan tuihna leh kan environment ti chhelo thei ang bera hma kan lak ho hi a tul takzet a ni, a ti.

Minister Prof.Lalnilawma leh AMC Corporator te hian inkawm hona hun tha tak an nei a, hetah hian State Sawrkar leh AMC te nen an thawhho that lehzual dan tur kawng te inpawh taka sawiho a ni.

AMC Corporator te hi Mayor Pu.H.Lalremtluanga hovin vawiin inkawmhonaah hian an tel a ni.