1136/2026-2027

Dated Champhai, 23rd June 2026: Food, Civil Supplies & Consumer Affairs Minister Pu B. Lalchhanzova'n vawiin khan FCI Godown, New Champhaiah raltlan te tana duan buhfai quintal 4229 leh kg 5 a sem chhuak.

Minister Pu B. Lalchhanzova chuan thu sawiin he hun buatsaihtute an buaina leh hahna avang tein lawmthu a hrilh a, mahni hun hlu tak senga lo kal khawmte chungah lawmthu a sawi bawk. Raltlan nih hi thil harsa leh hrehawm tak ni ngei tur a ni a, ei leh in mai bakah awmna tur pawh hmuh a har em em ang tih a sawi a, chung hrehawmna te chhawk zangkhai turin hetiang ruahmanna hi siam a ni tih a sawi a. Hei bakah hian raltlante chuan tanpuina dang tam tak an mamawh dawn a, Mizo leh Kristian kan nihna angin Champhai mipuite chuan tlawmngaihna leh tanpui duhna thinlung puin theih ang anga tanpuia thlamuan turin a chah a. Sawrkar thil tih hrang hrang hi mipui tello chuan a hlawhtling thei lo a, he ruahmanna pawh hi Champhaia khawtlang hruaitute leh mipuite tello chuan a hlawhtling thei lo a, thawhpuina tha tak neihpui zel turin a sawm a ni.

He hun hi Addl. DC Pu Lalbiakfela'n a kaihruai a, Champhai Bawrhsap Pu Mohammad Aaquib chuan inlawmna thu a sawi. A duh apiang tan thusawina hun hawn a ni a, District Civil Supply Officer Pu R. Lalmuankima'n lawmthu sawiin hun a khar a ni. Raltlan hi khaw/veng hrang hrang 43-ah mi 12,083 an awm a, mi pakhatin kg 35 zel an chang thei dawn a ni.

He hun zawh hian Minister B. Lalchhanzova chuan a department chan hrang hrang - Revenue office, Civil Supply office, Information & Public Relations office leh Legal Metrology office te a tlawh a, officer leh staff te nen inkawmna hun hmangin hma an sawn dan tur te, harsatna an sut kian dan tur leh thil dang pawimawh a sawipui a ni.