1135/2026-2027

Aizawl, the 23rd of June, 2026: Vawiin chawhnu dar 2:00 khan Pu Lalnghinglova Hmar, Minister of State (i/c), Sports & Youth Services Department, Aizawl West-II bialtu MLA ni bawk chuan Govt. Middle School, Tuikual North-a Basketball Court sak thar a hawng.

Basketball Court hawnna puala school-a hun tawi hmannaah bialtu MLA Pu Lalnghinglova Hmar chuan thu sawiin zirtirtute thahnemngaihna a fak a. Sawrkar sikulah chuan zirtirtu training chhuak an awm a, a bikin pawl sang lamah sawkar school-a luh kan intihhmuh a, kan inchuh nasat hle laiin a pawl hniam lamah erawh naupang an tlem, a ti a. Hei hi pawl hniam lama zirtirtute an chhiat thut vang a ni lo a, intihhmuh thil a ni, tiin, Sawrkar school-ah mi an luh duh nan theihtawp kan chhuah zel dawn a ni, Minister chuan a ti.

Sports Minister chuan sawi chhunzawmin, basketball court leh sum hman zat khaikhinin lungawithlak a tih thu a sawi a. A hman dan chungchangah pawh duat taka enkawl tur leh zirlaite dahpawimawh ber thin turin zirtirtute leh khawtlang hruaitute a chah a ni. Khawvel inthlak zelah sports hi eizawnna tlak a ni tawh a, Mizoram sawrkar pawhin Olympic 2036 thlir chungin, ‘Bana Kaih Empowering Mizoram Sports’ hnuaiah state pum huap sports coaching leh talent haichhuah a kalpui mek a ni, tiin, Minister chuan EMS hnuaia coach dil turin a chah nghal a ni.

Pu H. Lalhmingthanga, Director, Sports & Youth Services Department pawhin thu sawiin, GIA kaltlanga hna tha tak thawh a nih piahlamah documentation felfai tak siam a nih chu lawmawm a tih thu leh, Tuikual North khawtlangin hruaitu fel tak tak a nei chu vanneihthlak a tih thu a sawi a ni. Kothari Commission in a rawt angin infiamna leh taksa hriselna hi Education peng pawimawh tak, Co-Curricular Activity a ni, Director chuan a ti a. Infiamna chu taksa sawizawina a nih piahlamah thawhho zirna, kan chenhona kawnga mihringte min chhertu a ni, a ti bawk.

He huna thusawitu dang Pu C.Lalthanzira, State Project Director, Samagra Shiksha Mizoram chuan infiamna hmunhma tha chu education in a kentel pawimawh tak a ni a ti a. Basketball Court chuan naupang hriselna zirna kawngah pawh hmasawnna a thlen a beisei a, naupangte tihpui peih tur leh tang sauh saih turin zirtirtute a fuih a ni.

Tuikual North Middle School-a Basketball Court hi Sports & Youth Services Department Grant-in-Aid (2025-2026) atangin cheng nuai 15 senga a sak a ni a. Departmental work hmanga sak niin a dung feet 74 leh a vang feet 42 a ni. A thlanglamah thirlen hmanga hungna tha tak siam a ni bawk.

Vawiina Basketball Court hawnna puala hun hman hi Tuikual North Local Council Chairman Pu F Kamhmunga’n a kaihruai a, Headmistress Pi Rohlupuii’n lawmthu sawiin hun a khar a ni. Bialtu AMC Corporator Pi Vanlalhruaii bakah Aizawl West bialtu SDEO Pi Carolyn Rinthanpuii te, Tuikual North Local Council, MUP, MHIP aiawh te, Tuikual North M/S zirtirtu leh zirlai naupangte an tel bawk.