3748/2024-2025

Aizawl dated 10th January, 2025: Vawiin chawhma khan Land Revenue & Settlement Department chuan an hnathawh thlirletna hun ‘LR&S Expert Conclave: One Day Review Meeting’ an hmang a. Revenue Minister Pu B.Lalchhanzova chuan he hun hi hmanpuiin Pu Vanlalmawia, Secretary chuan hun a kaihruai a. LR&S Secretariat, Directorate Officer leh District hrang hrang a Settlement Officer-te he hun ah hian an tel a ni.

One Day Review Meeting hawnna ah hian Revenue Minister Pu B.Lalchhanzova chuan Land Revenue & Settlement Department-a thawktu kalkhawmte chu sulhnu felfai leh entawntlak nei tur a inzir peih leh intuaihriam reng peih mi ni turin a chah a. Department hnuai a an mawhphurhna zawn theuh ah mi rintlak leh rawntlak ni thei turin kum bul atanga tan la turin a fuih. Thil dik tawk lo, chinfel ngai nia kan hriatte chu midangin an lo en liam thin vang mai a hmu lo dertu nih chu buaina leh harsatna lian zawk thlen thintu a nih fo thu Revenue Minister chuan sawiin thil tha titur chuan buai leh mualpho ngam a hma latu nih tum theuh turin Officer kalkhawmte chu a chah a. Ram teh leh felfai tak a chhinchhiah hna kalpui chungchang ah mipuiin Reveneu Department lak ah beiseina sang tak an neih thu Minister chuan tarlangin mipui beiseina tihlawhtling turin mahni mawhphurhna theuh tha tak a hlenchhuak turin a chah bawk a ni.

Pu B.Lalchhanzova chuan Land Revenue & Settlement Department chu dawrtu ngah tak Department a nih angin min dawrtute hmachhawn kawngah hmel hmuh nuam pu turin leh hawihhawmna chhawm nung zel turin a chah a. Hnathawhna hmun chu kan rinna fiahna hmun ah hmangin, taimakna, rinawmna leh midang tan a malsawnna thlentu kan nih theihna hmun a siam thin turin a fuih a. Mipuiin kan Office enkawlte tangkai tak a an hman theih nan mipui tan a hna kan thawh sak theih hrang hrangte chu puanzar fo a pawimawh thu a sawi. 

Revenue Minister chuan District Collector Office leh Settlement Office-te chu inhne hnai zawk a kalkawp chho zel tur a nih thu tarlangin mipui tan a rawngbawlna an kalpui piah lam ah chhiah lak khawm hna pawimawh tak an neih chu ngai pawimawh turin a chah a. Department thawm changtlun zel nan Champhai leh Mamit district pisa sakna tur cheng vbc. 4.68 leh vbc. 4.5 chu  Special Assistance to States for Capital Investment (SASCI) hnuai ah hmuh a nih thu Minister chuan a tarlang bawk a ni.

LR&S Department One Day Review Meeting hi Session pathum a then niin chawhma hun ah hian Land Revenue Administration in Mizoram, Revenue Collection- Tax & Non-Tax Revenue leh Stamps & Registration tih thupui hmangte in zirtirna buatsaih a ni a. Session pahnihna ah hian District tin a hnathawhna kalpui dan thlirletna hun neih niin Session pathumna ah hian LR&S department hnathawh kaihhnawih a thupui pawimawh hrang hrang hmangin zirtirna neih a ni bawk.