Nimin atanga ni hnih chhung a bial fang kuala zin mek Lunglei West Assembly Constituency bialtu MLA leh Agriculture, Cooperation leh Irrigation and Water Resources Department-te changtu Minister ni bawk Pu C. Lalrinsanga chuan nimin khan Sazaikawn, Vanhne, Thuampui, Lungdai S, Serte, Sertlangpui, Kawlhawk, Buarpui khua te a tlawh hnuin vawiin khan Buarpui khua atana tui lakna thar ruahman mek 'Buarpui Water Supply Scheme' hmunhma a hmunah kalin a enfiah bakah a bial chhunga W Bungtlang khua a tlawh. 

Buarpui Water Supply Scheme hna kal mek hi tukin zing dar 7 khan Minister chuan tlawhin a hmunah Er Zodingpuia PHE SDO hovin Department thawktuten anlo hmuak a. He scheme hi cheng nuai 400 senga ruahman niin a tum ber chu ni zung chakna hmang tangkaia tui pump chhuah a ni a. He scheme kaltlang hian Buarpui khaw in tinah tui hnianghnar taka semchhuah tum a ni. Buarpui khuaa Lungphun lui tui pump chhuah tum niin hemi atan hian solar panel 120 (40 kw) bun fel tawh a ni a, nitin tui 80.38 cubic metre pump chhuak thei tura ruahmanna siam a ni. Buarpui water supply scheme hi kumin chhung ngeia zawhfel anih theih nan Minister hian Department hnathawktute ruahmanna siam puiin an mamawh thlente bawhzui nghal vat a tum thu a hrilh a ni. 

A khaw tlawh ah te Minister hi mipui thahnem takin lo hmuakin mipui, khawtlang hruaitute leh tlawmngai pawlte nen inkawmhona 'public meeting' hun tha tak an hmang a. Heng khua ah te hian khawtlang hmasawnna tura hnathawh tul hrang hrang a hmunah enfiahin sawrkar official-te leh khawtlang hruaitute hmalak dan tur a sawipui. 

A bial chhung ti hmasawn turin inkalpawhna kawng tha tak siam chu hna hmasaa a neih thu sawiin Lunglei to Buarpui road chu 'intermediate lane' a ruahman niin kum 2022 ah zawhfel tum a ni a. Kuthnathawktute thlai thar phur chhuah leh sumdawnna atana kawng pawimawh tak ni tura ruahman mek a ni, a ti. Tin, zirna a ngaih pawimawh thu sawiin a bial chhungah sawrkar laipui kaltlanga zirna in tha Eklavya Model Residential School din ngei tura hmalak a tum thu a sawi a. Amah lo hmuaktu zirlaite hnenah fuihna thu sawiin tum tak takna rilru pu chunga theihtawp chhuah tur leh hmathlir thui tak nei turin a chah a ni. 

Agriculture lama hmalak tul te sawiin kan buh leh thlai enkawl naah chemical fertilizer leh hlo thahna damdawite kan hman kalsan zelin ‘Organic Farming’ Mizoramah uar taka kalpui tum a nih thu a sawi. Kuthnathawktute tana sawrkar laipui scheme pawimawh tak kuthnathawktute pension scheme - Pradhan Mantri Kisan Mandhan Yojana (PM-KMY) leh thlai insurance scheme - Pradhan Mantri Fasal Bima Yojana(PMFBY) te pawh Mizoramah kalpui mek niin heng kuthnathawktute tana hamthatna te hi DAO Office - ah ngaihven leh hmang tangkai turin khaw tinah mipuite a chah a. UNDP hnuaia Global Environment Facility leh sawrkar laipui hnuaia Rainfed Area Development te pawh kalpui zel tum anih thu a tarlang bawk.  

Hmasawnna mamawh hrang hrang mipuiten a hnena an lo thlen te tih hlawhtlin ngei a tum thu sawiin mipuite pawh an mawhphurna hre renga sawrkar hmalaknate thahnemngai taka tawiawm a ti hlawhtling turin a chah a. A hmalakna ah te thurawn pe fo thin tur leh an mamawhte inthlahrung hauh lova thlen thin tura chahin mipui leh sawrkar official-te tawiawmna nen a mawhphurna te tha taka hlenchhuah ngei a tum thu a sawi. 

Minister hi Lunglei Additional DC Pu David Liansanglura Pachuau, Lunglei DAO Pu Tlangtimawia Zote, DIPRO Pi C. Lalremruati, ARCS Lunglei Pu H. Lalnuntluanga, I&WR SDO Pu Lalbiakdika leh official dangte bakah sawrkar flagship program Socio Economic Development Policy (SEDP) hnuaia Agriculture Development Board member pathum - Pu Lalropuia Pachuau, Pu Lalsangliana Hnamte leh Pu Lalruatfela Colney te bakah khawtlang hruaitute leh party hruaituten an tawiawm a, vawiin chawhnu hian Lunglei lam panin an haw leh ang


Attachment

  • Loading attachment...